७ फेब्रुवारीला सीटीईटी परीक्षेमुळे शिक्षकांची जिल्हाधिकाऱ्यांकडे धाव
निवडणूक ड्युटी रद्द करण्यासाठी मराठवाडा शिक्षक संघाचा पुढाकार
परभणी : जिल्हा परिषद सार्वत्रिक निवडणूक २०२६ च्या कर्तव्यावर असलेल्या ज्या शिक्षकांची सीटीईटी (CTET) परीक्षा ७ फेब्रुवारी २०२६ रोजी आहे, त्यांच्या निवडणूक नियुक्त्या रद्द करण्यात याव्यात, या मागणीसाठी मराठवाडा शिक्षक संघाने पुढाकार घेतला आहे.
यासंदर्भात जिल्हाधिकाऱ्यांना आग्रही निवेदन देण्यात येणार असून, संबंधितांनी शुक्रवारी दुपारी १२.३० वाजता जिल्हाधिकारी कार्यालयात उपस्थित राहावे, असे आवाहन करण्यात आले आहे.राज्य निवडणूक आयोगाने ७ फेब्रुवारी रोजी मतदानाची तारीख निश्चित केली आहे, मात्र याच दिवशी शिक्षकांसाठी महत्त्वाची असलेली सीटीईटी परीक्षा देखील आहे. निवडणूक कर्तव्य आणि परीक्षा एकाच दिवशी आल्याने शिक्षकांसमोर पेच निर्माण झाला आहे. त्यामुळे ज्या शिक्षकांची परीक्षा आहे, त्यांनी आपल्या परीक्षेचे प्रवेशपत्र (Hall Ticket) सोबत जोडून विनंती अर्ज देण्याचे आवाहन संघटनेने केले आहे.या मोहिमेसाठी जिल्हाध्यक्ष यशवंत मकरंद, जिल्हा सचिव निशांत हाके, महिला आघाडी जिल्हाध्यक्ष दुर्गाताई देशमुख, जिल्हा उपाध्यक्ष संतोष साखरे, अमित मोगल, दादाराव कदम, पूर्णा तालुकाध्यक्ष रमेश सुर्यवंशी, सेलू सचिव विजय धापसे, खंडागळे आणि कदम यांनी पुढाकार घेतला आहे. परभणी जिल्ह्यातील सर्व परीक्षार्थी शिक्षकांनी मोठ्या संख्येने उपस्थित राहून आपले निवेदन सादर करावे, असे आवाहन मराठवाडा शिक्षक संघाच्या वतीने करण्यात आले आहे.
