कौशल्य विकास आणि उद्योग उभारणीसाठीच्या विविध शासकीय योजनांची माहिती व मार्गदर्शन कार्यक्रम
सेलू, जि.परभणी: ज्या जातींना शासनाचा कोणताही स्वतंत्र विभाग किंवा महामंडळामार्फत लाभ मिळत नाही, अशा खुल्या प्रवर्गातील घटकांसाठी महाराष्ट्र संशोधन, उन्नती व प्रशिक्षण प्रबोधिनी (अमृत) या संस्थेतर्फे सेलू येथे जिल्हास्तरीय मेळाव्याचे आयोजन करण्यात आले आहे.
हा मेळावा शुक्रवार, १९ सप्टेंबर २०२५ रोजी सायंकाळी ४:३० वाजता श्री केशवराज बाबासाहेब महाराज मंदिर, सेलू येथे होणार आहे.या मेळाव्याचा मुख्य उद्देश ब्राह्मण, कोमटी, आर्य वैश्य, मारवाडी, सिंधी, गुजराती, राजपूत, पाटीदार यांसारख्या समाजातील नागरिकांना अमृत संस्थेच्या विविध शैक्षणिक, कौशल्य विकास आणि उद्योग उभारणीसाठीच्या योजनांची माहिती देणे आहे. कार्यक्रमात अमृत संस्थेचे राज्य समन्वयक श्री. दीपक जोशी आणि सेलूचे उपविभागीय दंड अधिकारी श्री. शैलेशजी लाहोटी यांची प्रमुख उपस्थिती राहणार आहे.
मेळाव्यात विद्यार्थ्यांसाठी स्पर्धा परीक्षांचे मार्गदर्शन, उद्योग-व्यवसाय निवडीचे मार्गदर्शन, उच्च व तांत्रिक रोजगार प्रशिक्षण (IGTR), इलेक्ट्रॉनिक्स आणि उच्च कार्यक्षमता संगणक प्रशिक्षण (C-DAC, NIELIT) यांसारख्या योजनांची माहिती दिली जाईल. तसेच, उद्योजकांसाठी वैयक्तिक व्याज परतावा आणि अमृतपेठ यांसारख्या महत्त्वाच्या योजनांवरही मार्गदर्शन उपलब्ध असेल.
हे सर्व प्रशिक्षण अमृत संस्थेकडून लक्षित घटकांसाठी विनामूल्य राबविले जाते. या मेळाव्याच्या आयोजनामागे खुला प्रवर्गातील समाजाच्या उन्नतीचा उद्देश आहे, असे अमृत संस्थेचे जिल्हा व्यवस्थापक श्री. अनिरुद्ध काटे आणि जिल्हा उपव्यवस्थापक श्री. नितीन खेकाळे यांनी सांगितले. जास्तीत जास्त नागरिकांनी या मेळाव्यात उपस्थित राहून या योजनांचा लाभ घ्यावा, असे आवाहन त्यांनी केले आहे. अधिक माहितीसाठी इच्छुक नागरिक ९६२३५३१६०१ आणि ७३९१०६५४७३ या क्रमांकांवर संपर्क साधू शकतात.
