सेलूची मुख्याधिकारी नियुक्ती पुन्हा चर्चेत
परभणी : सेलू नगरपालिकेचे प्रभारी मुख्याधिकारी आणि परभणी महापालिकेतील उपायुक्त तुकाराम कदम यांच्या नियुक्तीवरून सेलू शहरात मोठा राजकीय ‘ट्विस्ट’ पुन्हा चर्चेत आला आहे. नगर विकास खात्याने त्यांची प्रतिनियुक्ती रद्द करून दुसऱ्या अधिकाऱ्याची नियुक्ती करण्याचे आदेश जारी केले होते. मात्र, अवघ्या एका रात्रीतच या आदेशाला स्थगिती देत, पुन्हा तुकाराम कदम यांचीच प्रभारी मुख्याधिकारी म्हणून नियुक्ती करण्यात आल्याचे नवीन आदेश धडकले आहेत.
काय घडले एका रात्रीतच ?
गेल्या जून महिन्यापासून तुकाराम कदम यांची सेलू पालिकेच्या प्रभारी मुख्याधिकारीपदी नियुक्ती करण्यात आली होती. सध्या पालिका निवडणुकीची आचारसंहिता सुरू आहे. ६ नोव्हेंबर रोजी सायंकाळी नगर विकास खात्याच्या उपसचिव प्रियंका कुलकर्णी-छापवाले यांनी आदेश जारी करत, प्रभारी अधिकाऱ्याच्या अधिपत्याखाली निवडणुका नको या कारणास्तव कदम यांची प्रतिनियुक्ती रद्द केली. त्यांच्या जागी त्र्यंबक कांबळे यांची नियुक्ती झाल्याचे शासकीय आदेश जारी केले. याची सोशल मीडियावर मोठी चर्चा रंगात असतानाच शुक्रवार, ७ नोव्हेंबर रोजी दुपारी पुन्हा तुकाराम कदम यांचीच सेलू नगरपालिकेच्या प्रभारी मुख्याधिकारी पदावर नियुक्ती करण्यात आल्याचे आदेश उपसचिव प्रियंका कुलकर्णी-छापवाले यांच्याच सहीनेच धडकले. दरम्यान, हा राजकीय ‘ट्विस्ट’ सध्या चांगलाच चर्चेत आहे.
