सेलूचे वैद्यकीय अधीक्षक डॉ.संजय हरबडे यांची ग्वाही
सेलू : सेलू उपजिल्हा रुग्णालयाचे प्रभारी वैद्यकीय अधीक्षक म्हणून डॉ.संजय रंगनाथराव हरबडे यांनी नुकताच पदभार स्वीकारला आहे. सेलू शहर व परिसरातील नागरिकांना उत्कृष्ट व दर्जेदार आरोग्य सेवा देण्यासाठी आपण कटिबद्ध आहोत, अशी ग्वाही त्यांनी दिली.
डॉ.संजय हरबडे यांनी याआधीही सेलू उपजिल्हा रुग्णालयात वैद्यकीय अधीक्षक म्हणून सेवा दिलेली आहे. विशेषतः कोरोनाच्या संकट काळात अक्षरशः देवदूत म्हणून त्यांनी दिलेली रूग्ण सेवा उल्लेखनीय तसेच संस्मरणीय ठरली आहे. त्यांच्या कामाची शैली आणि सर्वसामान्य रुग्णांच्या आरोग्य सेवांबाबतच्या तळमळीचा अनेकांनी गौरव केला. उत्कृष्ट आरोग्य सेवा पुरवणे हेच त्यांचे सेवाध्येय राहिले आहे. त्यांच्या आधीच्या कार्यकाळात उपजिल्हा रुग्णालयात महिला रुग्णांना सोनोग्राफी, सिझेरीन व कुटुंब नियोजन शस्त्रक्रिया तसेच नेत्र तपासणी व शस्त्रक्रिया आदी सुविधा उपलब्ध करून देण्यासाठी त्यांनी पुढाकार घेतला होता. सामाजिक उपक्रमांत हिरीरीने सक्रिय सहभाग घेत सेलूकरांशी दृढ नाते जपले.
पुन्हा एकदा सेलूकरांची सेवा करण्याची संधी त्यांना मिळाली असून आरोग्य विषयक सेवा अधिक दर्जेदार करण्यावर भर देणार असल्याचे वैद्यकीय अधीक्षक डॉ.संजय हरबडे यांनी सांगितले. रुग्णांना काहीही अडचण वा आरोग्यविषयक मदत लागली, तर ९३०९९८४२८२ या क्रमांक वर संपर्क साधण्याचे आवाहनदेखील त्यांनी केले आहे.
