कपड्याच्या तंत्रज्ञानाची व खादीच्या महत्त्वाची घेतली माहिती
सेलू : सेलू शहरातील नूतन विद्यालयातील इयत्ता पाचवी आणि सहावीच्या विद्यार्थ्यांना त्यांच्या अभ्यासक्रमातील ‘वस्त्र मूलभूत गरज’ हा पाठ अधिक चांगल्या प्रकारे समजावून सांगण्यासाठी एक शैक्षणिक उपक्रम राबवण्यात आला. या उपक्रमांतर्गत शिक्षक आणि ७० विद्यार्थ्यांनी सेलू येथील खादी ग्रामोद्योग भांडारला भेट दिली.या भेटीमागे विद्यार्थ्यांना पुस्तकी ज्ञानासोबतच प्रत्यक्ष अनुभव देणे हा मुख्य उद्देश होता. खादी ग्रामोद्योग भांडारमध्ये विद्यार्थ्यांना कपड्याचे तंत्रज्ञान, विविध प्रकारच्या वस्त्रांचा टिकाऊपणा आणि विशेषतः खादीचे महत्त्व सविस्तरपणे पटवून देण्यात आले.यावेळी खादी ग्रामोद्योग भांडारचे संचालक प्रवीण माणकेश्वर आणि आनंद बाहेती यांनी पुढाकार घेऊन विद्यार्थ्यांना मोलाची माहिती दिली. तसेच, त्यांनी विद्यार्थ्यांना खाऊ वाटप करून त्यांच्या भेटीचा आनंद द्विगुणित केला. या उपक्रमासाठी शिक्षक भगवान देवकते आणि सुशील कुलकर्णी यांनी विशेष परिश्रम घेऊन आयोजन केले.
