सेलूतून दहा बस फेऱ्या वाढवल्या
सेलू : सिमुरगव्हाण (ता. पाथरी) येथे गुरुवारी (ता. ४) श्री दत्त जयंती निमित्ताने भव्य धार्मिक सोहळा पार पडला. या सोहळ्याचे आयोजन जगद्गुरू रामानंदाचार्य नरेंद्राचार्य महाराज यांच्या प्रमुख उपस्थितीत करण्यात आले. परजिल्ह्यातून मोठ्या संख्येने आलेल्या भाविकांसाठी सेलू येथून परिवहन महामंडळाने अतिरिक्त दहा फेऱ्या एस. टि. बस ठेवून प्रवासाची सोय केली.परजिल्ह्यातीतून आलेल्या भाविकांना सुलभ व सुरक्षित प्रवासाचा आधार झाला. सकाळी सुमारे ८ वाजता सुरू झालेल्या सोहळ्यात उपपिठ सिमुरगव्हाण येथे दत्तात्रय मुर्तीची विधिवत पूजा, अभिषेक व धार्मिक विधी पार पडले. दत्ताच्या जन्मोत्सवाच्या दिवशी विविध धार्मिक कार्यक्रमांमध्ये भक्तांनी भाग घेतला. या कार्यक्रमात पिठाचे उत्तराधिकारी प.पू. कानिफनाथ महाराज आणि जगद्गुरू रामानंदाचार्य नरेंद्राचार्य महाराजांचे प्रवचन झाले. ज्याने भाविकांचे मन धार्मिक अनुभवाने परिपूर्ण झाले.सायंकाळी ६ वाजता स्वागतसभा व दत्त जन्मोत्सव सोहळा संपन्न झाला. यावेळी मुलभूत सांस्कृतिक कार्यक्रम तसेच अभंग गायनाचे आयोजन झाले. भाविकांची मोठी गर्दी होती.या सोहळ्यासाठी परजिल्ह्यातील विविध भागातून रेल्वेने सेलू येथे भाविक आले होते. सिमुरगव्हाण पर्यंत जाणे येणे सोईचे व्हावे यासाठी वाहतूक नियंत्रक वसंतराव बोराडे व पवार यांच्या मार्गदर्शनाखाली गुरुवारपासून शनिवारपर्यंत दहा अतिरिक्त एस.टी. बस फेऱ्या वाढवल्या होत्या. ज्यामुळे भाविकांना मोठा दिलासा मिळाला. कार्यक्रमाला वाल्मिकी बँकेचे चेअरमन अनिल नखाते, माजी जि. प. उपाध्यक्षा भावनाताई नखाते, माजी जि. प. सभापती दादासाहेब टेंगसे, मिराताई टेंगसे तसेच माजी खासदार चंद्रकांत खैरे, रोहीदास टेंगसे सपत्नीक उपस्थित होते. या दत्त जयंती सोहळ्याने सिमुरगव्हाणचा धार्मिक व सांस्कृतिक वारसा अधिकच समृद्ध केला असून भाविकांचे मन आनंदाने परिपूर्ण झाले.
