८ डिसेंबरपासून नागपूर अधिवेशनाच्या पार्श्वभूमीवर आंदोलन
सेलू : गेल्या वीस वर्षांपासून शासनाकडून कोणतीही मूलभूत मागणी मान्य न झाल्याने समग्र शिक्षण योजनेतील करार कर्मचाऱ्यांचा संताप अनावर झाला आहे. ८ डिसेंबरपासून सुरू होणाऱ्या नागपूर हिवाळी अधिवेशनात सर्व कंत्राटी कर्मचारी आमरण उपोषणास बसणार आहेत. सेवेत सरसकट समायोजन करा किंवा इच्छामरणाची परवानगी द्या, या मागणीसाठी राज्यभरातील तीन हजारांहून अधिक कर्मचारी आंदोलनात सहभागी होणार आहेत.समग्र शिक्षणातील तेरा संवर्गांतील कर्मचारी वीस वर्षापासून अत्यल्प मानधनावर, कोणत्याही आरोग्य सुविधेविना, अपघात -आजारांवरील आर्थिक मदतीविना काम करत आहेत. या काळात २०० हून अधिक कर्मचाऱ्यांचा सेवेत असतानाच मृत्यू झाला, परंतु त्यांच्या कुटुंबियांना शासनाने कोणतीही मदत केली नाही. माजी मुख्यमंत्री एकनाथ शिंदे यांनी ३१०० कंत्राटी कर्मचाऱ्यांच्या समायोजनासाठी अभ्यास समिती नेमली होती. या समितीने राज्यभरातील विविध नमुन्यांचा अभ्यास करून अहवाल शासनास सादर केला आहे. हा अहवाल अधिवेशनात पटलावर मांडून मंजूर करण्याची मागणी कर्मचाऱ्यांनी केली आहे. सेलू येथील कर्मचाऱ्यांनी पालकमंत्री मेघना साकोरे-बोर्डीकर यांच्या कार्यालयात निवेदन सादर केले आहे.
