विद्यार्थ्यांच्या खाद्य स्टॉल्समधून उमजले व्यवहाराचे गणित
जिंतूर/प्रतिनिधी : जिंतूर शहरातील गुरुदेव नगर येथील पोदार जंबो किड्समध्ये विद्यार्थ्यांना पुस्तकी ज्ञानासोबतच व्यावहारिक अनुभव मिळावा, या उद्देशाने ‘आनंद नगरी’ या उपक्रमाचे आयोजन करण्यात आले होते. शनिवारी पार पडलेल्या या उपक्रमात चिमुकल्यांनी विविध खाद्यपदार्थांचे स्टॉल्स लावून पालकांचे आणि नागरिकांचे लक्ष वेधून घेतले. अनुभवातून शिक्षण देणाऱ्या या अभिनव उपक्रमाचे शहरात मोठे कौतुक होत आहे.
या फन फेअरमध्ये विद्यार्थ्यांनी पालकांच्या मदतीने उभारलेल्या स्टॉल्सवर चविष्ट पदार्थांची रेलचेल होती. केवळ खाद्यपदार्थांची विक्री न करता, त्यामागील तयारी, साहित्याचे मोजमाप, आर्थिक व्यवहार आणि ग्राहकांशी साधला जाणारा संवाद यातून विद्यार्थ्यांच्या गणिती संकल्पना आणि सामाजिक कौशल्ये विकसित होण्यास मदत झाली. स्वच्छतेचे भान राखून करण्यात आलेले सादरीकरण हा या उपक्रमाचा विशेष भाग ठरला.
रंगीबेरंगी सजावटीने सजलेल्या शालेय परिसरात विद्यार्थ्यांच्या उत्साहाने चैतन्य पसरले होते. शाळा, पालक आणि विद्यार्थी यांच्यातील सुसंवाद वृद्धिंगत करणाऱ्या या सोहळ्यात पालकांनी मोठ्या संख्येने उपस्थित राहून विद्यार्थ्यांचे मनोबल वाढवले. अशा उपक्रमांमुळे मुलांमध्ये स्वावलंबन, जबाबदारी आणि सर्जनशीलता विकसित होत असल्याची भावना अनेक पालकांनी यावेळी व्यक्त केली.
कार्यक्रमाच्या यशस्वीतेसाठी शाळेतील शिक्षकवृंद आणि कर्मचाऱ्यांनी परिश्रम घेतले. समारोपप्रसंगी प्राचार्य आशा दराडे यांनी विद्यार्थ्यांचे आणि पालकांचे कौतुक केले. आनंद नगरीसारख्या उपक्रमांमुळे मुलांचे शिक्षण अधिक अर्थपूर्ण आणि रंजक होते, असे मत त्यांनी आपल्या मनोगतात व्यक्त केले. विद्यार्थ्यांचा उत्साह आणि पालकांचा सक्रिय सहभाग यामुळेच ही आनंद नगरी खऱ्या अर्थाने यशस्वी झाल्याचे त्यांनी नमूद केले.
