क्रीडा स्पर्धेत प्रिन्स इंग्लिश स्कूलचे वर्चस्व, जिल्हास्तरीय स्पर्धेसाठी निवड
सेलू/प्रतिनिधी : जिल्हा युवा अधिकारी कार्यालय व मेरा युवा भारत केंद्र, परभणी तसेच श्रीराम प्रतिष्ठान, सेलू यांच्या संयुक्त विद्यमाने आयोजित तालुकास्तरीय क्रीडा स्पर्धेत एल. के. आर. रोडगे प्रिन्स इंग्लिश स्कूलच्या खेळाडूंनी ऐतिहासिक कामगिरी केली आहे. या स्पर्धेत शाळेने विविध क्रीडा प्रकारांमध्ये आपले वर्चस्व गाजवत एकाच दिवशी तब्बल १३ चषकांवर नाव कोरले. या घवघवीत यशामुळे यशस्वी खेळाडूंची आता जिल्हास्तरीय स्पर्धेसाठी पात्रता निश्चित झाली आहे.
श्रीराम प्रतिष्ठानच्या मैदानावर पार पडलेल्या या स्पर्धेत प्रिन्स इंग्लिश स्कूलच्या मुला-मुलींनी सांघिक आणि वैयक्तिक प्रकारात उत्कृष्ट कौशल्य दाखवले. १८ वर्षांखालील मुलींच्या खो-खो संघाने प्रथम क्रमांक पटकावला, तर मुलांच्या कबड्डी संघाने प्रथम व द्वितीय अशा दोन्ही क्रमांकांवर कब्जा केला. धावण्याच्या शर्यतीत अरुण फोले आणि प्रतिभा माघाडे यांनी प्रथम क्रमांक मिळवला, तर गोळा फेक प्रकारात संभाजी खोकले आणि मनीषा धनवे यांनी सुवर्ण यश संपादन केले. यासोबतच धावणे आणि गोळा फेकच्या इतर गटांत संभाजी खोकले, एकनाथ माघाडे, मनीषा धनवे, रंजनी दारशिंबे, रजनी धांडे आणि वैशाली कसदेकर यांनी अनुक्रमे द्वितीय व तृतीय क्रमांक मिळवत चषकांची संख्या वाढवली.
खेळाडूंच्या या उल्लेखनीय यशाबद्दल श्रीराम प्रतिष्ठानचे संस्थापक अध्यक्ष डॉ. संजय रोडगे, सचिव डॉ. सविता रोडगे आणि सदस्य डॉ. आदित्य रोडगे यांनी आनंद व्यक्त केला आहे. तसेच कृषी उत्पन्न बाजार समितीचे संचालक अ‍ॅड. दत्तराव कदम, माऊली ताठे, प्रशासकीय अधिकारी प्रा. महादेव साबळे, प्राचार्य कार्तिक रत्नाला आणि प्रा. प्रगती क्षिरसागर यांनी विजयी खेळाडूंचे अभिनंदन केले. या खेळाडूंना सुरज शिंदे, कपील ठाकूर, प्रमोद गायकवाड, मुन्ना शेख, कुणाल चव्हाण आणि आकाश पवार यांचे मार्गदर्शन लाभले.
