बांबू लागवड बिलासाठी पाच हजार रुपयांची लाच स्वीकारताना पाथरी टोल नाका येथे रंगेहाथ कारवाई
परभणी : बांबू लागवडीच्या कामाचे बिल मंजूर करून ते स्वाक्षरीसह वरिष्ठ कार्यालयाकडे पाठवण्यासाठी लाचेची मागणी करणाऱ्या सामाजिक वनीकरण विभागातील वनपालाला लाचलुचपत प्रतिबंधक विभागाने रंगेहाथ पकडले आहे. अमोल गणेशराव फड असे अटक करण्यात आलेल्या ३९ वर्षीय आरोपीचे नाव असून तो सामाजिक वनीकरण विभाग सेलू येथे वनपाल म्हणून कार्यरत होता, तसेच त्याच्याकडे वनपरिक्षेत्र अधिकारी पदाचा अतिरिक्त कार्यभारही होता.या प्रकरणातील तक्रारदार यांची मानवत तालुक्यातील मौजे मानोली येथे शेतजमीन असून, त्या ठिकाणी बांबू लागवडीचे कुशल काम करण्यात आले होते. या कामाचे १ लाख ७३ हजार २८० रुपयांचे बिल मंजूर करण्यासाठी आरोपी अमोल फड याने एकूण बिलाच्या १५ टक्के रकमेची मागणी केली होती. या मागणीबाबत दोन्ही बाजूंमध्ये तडजोड होऊन १० हजार रुपयांची लाच देण्याचे ठरले होते. या ठरलेल्या रकमेपैकी २ हजार रुपये आरोपीने आधीच स्वीकारले होते, तर उर्वरित रकमेसाठी त्याने तक्रारदाराकडे वारंवार तगादा लावला होता.या त्रासाला कंटाळून तक्रारदाराने १६ डिसेंबर रोजी परभणी येथील लाचलुचपत प्रतिबंधक विभागाकडे रीतसर तक्रार दाखल केली. या तक्रारीची शहानिशा करण्यासाठी विभागाने पडताळणी केली असता आरोपीने लाचेची मागणी कायम ठेवल्याचे स्पष्ट झाले. त्यानुसार १६ डिसेंबर रोजी पाथरी टोल नाका परिसरात सापळा रचण्यात आला. या ठिकाणी तक्रारदाराकडून लाचेचा हप्ता म्हणून ५ हजार रुपये स्वीकारत असताना लाचलुचपत प्रतिबंधक विभागाच्या पथकाने झडप घालून आरोपीला ताब्यात घेतले.या प्रकरणी पाथरी पोलीस ठाण्यात भ्रष्टाचार प्रतिबंध अधिनियम १९८८ च्या कलम ७ अन्वये गुन्हा क्रमांक ७०९/२०२५ नुसार गुन्हा दाखल करण्यात आला आहे. ही कारवाई लाचलुचपत प्रतिबंधक विभागाचे पोलीस उपअधीक्षक महेश पाटणकर यांच्या मार्गदर्शनाखाली करण्यात आली असून पुढील तपास पोलीस निरीक्षक अल्ताफ मुलाणी करत आहेत. शासकीय कामासाठी लाचेची मागणी करणाऱ्या अधिकाऱ्यांवर झालेल्या या कारवाईमुळे जिल्ह्यात खळबळ उडाली आहे.
