सेलूतील श्रीराम प्रतिष्ठानचा सुरभी महोत्सव
सेलू जि.परभणी : सेलू येथील श्रीराम प्रतिष्ठान आयोजित सुरभि महोत्सवात उत्कर्ष विद्यालय व ज्ञानतीर्थ विद्यालयाच्या बालकलाकारांनी आपल्या सुप्त कलागुणांनी तसेच ‘गजर माऊलीचा’ महानाट्याने प्रेक्षकांची मने जिंकली.
विद्याविहार संकुल येथे पार पडलेल्या या कार्यक्रमाचे उद्घाटन गटशिक्षणाधिकारी गजानन वाघमारे यांच्या हस्ते झाले. या प्रसंगी संस्थेचे अध्यक्ष डॉ. संजय रोडगे, सचिव डॉ. सविता रोडगे, प्रशासकीय अधिकारी प्रा.महादेव साबळे यांच्यासह विविध क्षेत्रांतील मान्यवर उपस्थित होते.कार्यक्रमाचे मुख्य आकर्षण ठरलेल्या ‘गजर माऊलीचा’ या महानाट्यात १२० हून अधिक विद्यार्थ्यांनी सहभाग घेतला. संत ज्ञानेश्वरांच्या जीवनकार्यावर आधारित या नाटिकेने वारकरी संस्कृतीची ओळख करून दिली. यामध्ये रेड्याच्या मुखातून वेद वदवणे आणि भिंत चालवणे यांसारख्या प्रसंगांनी उपस्थितांना मंत्रमुग्ध केले. माणुसकी हाच खरा धर्म असल्याचा संदेश या महानाट्यातून देण्यात आला.या वेळी इयत्ता १० वीमधील कृष्णा रासवे याला ‘युवराज’ तर सई सोनटक्के हिला ‘युवराज्ञी’ पुरस्काराने सन्मानित करण्यात आले. मुलांच्या सर्वांगीण विकासासाठी हे व्यासपीठ अत्यंत महत्त्वाचे असल्याचे डॉ. संजय रोडगे यांनी नमूद केले. प्रास्ताविक मुख्याध्यापक कैलास ताठे यांनी केले, तर सूत्रसंचालन संजय ठाकर व इतर विद्यार्थ्यांनी केले. या महोत्सवास पालक आणि नागरिक मोठ्या संख्येने उपस्थित होते. ‘अराउंड द ग्लोब’ सोहळा रंगला सुरभी महोत्सवात प्रिन्स इंग्लिश स्कूलचा ‘अराउंड द ग्लोब’ हा वैशिष्ट्यपूर्ण कार्यक्रम रंगला विद्यार्थ्यांनी भारत, स्पेन, जपान, ब्राझील यांसह विविध देशांची संस्कृती आणि नृत्यशैली आपल्या सादरीकरणातून प्रभावीपणे मांडली. या वेळी उज्ज्वल निकम याला ‘प्रिन्स’ तर तनिष्का तेलभरे हिला ‘प्रिन्सेस ऑफ द स्कूल’ पुरस्काराने सन्मानित करण्यात आले.संस्थेचे अध्यक्ष डॉ. संजय रोडगे यांनी गुणवत्तापूर्ण शिक्षणातून जागतिक स्तरावर सक्षम विद्यार्थी घडवण्याचा संकल्प व्यक्त केला. अनेक मान्यवर उपस्थित होते.
