गटशिक्षणाधिकारी गजानन वाघमारे यांचे शाळांना सहभागाचे आवाहन
सेलू : शिक्षण विभाग पंचायत समिती आणि श्री केशवराज बाबासाहेब विद्यालय यांच्या संयुक्त विद्यमाने इयत्ता पाचवी व आठवीच्या विद्यार्थ्यांसाठी तालुकास्तरीय शिष्यवृत्ती परीक्षा आयोजित करण्यात आली आहे. या उपक्रमात तालुक्यातील जास्तीत जास्त शाळांनी सहभागी होऊन विद्यार्थ्यांना संधी उपलब्ध करून द्यावी, असे आवाहन शिक्षण विभागाने केले आहे.
गटशिक्षणाधिकारी गजानन वाघमारे यांनी सर्व शाळांना पाठविलेल्या अधिकृत पत्रानुसार, ही परीक्षा सोमवार, २ फेब्रुवारी २०२६ रोजी श्री केशवराज बाबासाहेब विद्यालय येथे होणार आहे. परीक्षेचा पहिला पेपर (मराठी व गणित) सकाळी ११ ते १२.३० या वेळेत, तर दुसरा पेपर (इंग्रजी व बुद्धिमत्ता) दुपारी १.३० ते ३.०० या वेळेत घेतला जाईल. या परीक्षेसाठी प्रत्येक विद्यार्थ्याकडून ५० रुपये शुल्क आकारले जाणार असून नोंदणी गुगल फॉर्मद्वारे करायची आहे. शाळांनी आपल्या विद्यार्थ्यांची नावे २९ जानेवारी २०२६ पर्यंत नोंदवावीत, असे निर्देश देण्यात आले आहेत.
या स्पर्धेत दोन्ही इयत्तांसाठी स्वतंत्र आकर्षक पारितोषिके देण्यात येणार आहेत. यामध्ये प्रथम पारितोषिक ३००० रुपये, द्वितीय २००० रुपये आणि तृतीय १००० रुपये तसेच स्मृतिचिन्ह देऊन गौरवण्यात येईल. सहभागी सर्व शाळांना प्रशस्तीपत्र प्रदान केले जाणार आहे. कल्याणम एज्युकेशन सोसायटी परभणी व श्री केशवराज बाबासाहेब विद्यालय माजी विद्यार्थी संघ यांच्या सहकार्याने हे आयोजन केले जात आहे. ग्रामीण भागातील विद्यार्थ्यांना स्पर्धात्मक वातावरण आणि गुणवत्तावाढीसाठी ही मोठी संधी असल्याचे शिक्षण विभागाने नमूद केले आहे.
