सेलू तालुक्यातील हदगाव खुर्द जिल्हा परिषद शाळेला भेट
सेलू : अधिकारी येतात, पाहणी करतात आणि निघून जातात; मात्र विद्यार्थ्यांमध्ये रमून, त्यांच्याशी संवाद साधत मार्गदर्शन करणारे अधिकारी क्वचितच पाहायला मिळतात. अशाच एका प्रेरणादायी भेटीदरम्यान, जिल्हा परिषदेच्या मुख्य कार्यकारी अधिकारी नतीशा माथूर हदगाव खुर्द येथील जिल्हा परिषद प्राथमिक शाळेतील विद्यार्थ्यांमध्ये रमल्याचे दिसून आले.
या शाळेला भेट देऊन विद्यार्थ्यांशी त्यांनी मनमोकळा संवाद साधला. काही वेळासाठी त्यांनी आपल्या प्रशासकीय पदाची चौकट बाजूला ठेवत शिक्षिकेच्या भूमिकेतून विद्यार्थ्यांना मार्गदर्शन केले. अभ्यास, शिस्त, स्वप्ने आणि आयुष्यातील मूल्ये याविषयी त्यांनी अत्यंत सोप्या आणि प्रभावी शब्दांत विद्यार्थ्यांशी चर्चा केली.
मुख्य कार्यकारी अधिकारी स्वतः वर्गात येऊन शिकवताना पाहून विद्यार्थ्यांमध्ये विशेष उत्सुकता आणि आनंदाचे वातावरण निर्माण झाले होते. अधिकारी थेट शिक्षकाच्या भूमिकेत पाहून विद्यार्थ्यांना याचे नवल वाटले, तर शिक्षक व पालकवर्गानेही या कृतीचे विशेष कौतुक केले.या छोट्या पण अर्थपूर्ण कृतीमुळे प्रशासन आणि शिक्षण यातील दरी कमी होत असल्याचा संदेश मिळाल्याचे मत उपस्थितांनी व्यक्त केले. गट विकास अधिकारी उदय जाधव, गट शिक्षणाधिकारी गजानन वाघमारे यांच्या पुढाकाराने हा उपक्रम झाला. याबद्दल ग्रामस्थांनी आनंद व्यक्त केला.
