स्वामी शिवगिरी महाराज यांच्या कथेला भाविकांची गर्दी
परभणी : संत श्री १०८ सद्गुरू स्वामी रामानंद सरस्वती (तुकाबाबा) यांच्या ३४ व्या पुण्यतिथी सोहळ्यानिमित्त अंबडजवळील ताडहादगाव येथील श्रीक्षेत्र दत्त संस्थानच्या वतीने आयोजित ज्ञानेश्वरी पारायण आणि संगीत शिवमहापुराण कथा सोहळ्याची मंगळवारी, ३ फेब्रुवारी रोजी उत्साहात सांगता झाली.
राष्ट्रसंत सद्गुरू जनार्दन स्वामींचे कृपापात्र शिष्य अनंत विभूषित श्री श्री १००८ महामंडलेश्वर स्वामी शिवगिरी महाराज (त्र्यंबकेश्वर) यांनी २७ जानेवारीपासून शिवमहापुराण कथेचे निरूपण केले. कथाश्रवणाला पंचक्रोशीतील भाविकांनी मोठी गर्दी केली होती. मठाधिपती आत्मानंद महाराज शास्त्री यांच्या मार्गदर्शनाखाली महोत्सवाच्या काळात काकडा भजन, विष्णुसहस्रनाम स्तोत्र, ज्ञानेश्वरी पारायण पार, तर दुपारी संगीत शिवमहापुराण कथेचा लाभ भाविकांनी घेतला. सायंकाळी हरिपाठ आणि दररोज रात्री ९ वाजता आयोजित कीर्तनातून ज्ञानेश्वर महाराज देशमुख, विष्णू महाराज केंद्रे, तुकाराम महाराज कडपे, विश्वंभर महाराज मालोदे आदींसह नामवंत कीर्तनकारांनी मार्गदर्शन केले. परिसरातील अनेक गावांतील भाविकांनी जागर सोहळ्यात सहभाग घेतला. मंगळवारी आत्मानंद महाराज शास्त्री यांचे काल्याचे कीर्तन आणि महाप्रसादाने सोहळ्याची सांगता झाली.
