सेलूत महाशिवरात्री निमित्त विविध कार्यक्रम, साईबाबा मंदिरात श्री महेश्वर लिंग यांच्या दर्शनासाठी रांगा
सेलू : शहरातील अतिशय पुरातन आणि ग्रामदैवत म्हणून ओळखले जाणारे शंकरलिंग भगवंताचे मंदिर महाशिवरात्री निमित्त भाविकांच्या गर्दीने फुलून गेले आहे. या मंदिरात दैनंदिन शिवभक्तांच्या दर्शनासाठी रांगा लागतात, परंतु महाशिवरात्रीचे औचित्य साधून भाविकांनी मोठ्या भक्तिभावाने आणि श्रद्धेने दर्शनाला सकाळपासून सायंकाळीही गर्दी केली होती.
अभिषेक करणाऱ्या आणि दर्शन घेणाऱ्या भक्तांची संख्या मोठी असल्याने सर्वांना शिस्तीत दर्शन मिळावे यासाठी पोलीस आणि होमगार्डच्या बंदोबस्तात भाविकांना मंदिरात सोडण्यात आले.या दरम्यान मंदिराचे पदाधिकारी यांनी भक्तांना कोणताही त्रास होऊ नये यासाठी विशेष परिश्रम घेतले. महाशिवरात्री निमित्त मंदिरावर आकर्षक विद्युत रोषणाई करण्यात आली असून स्वच्छता, पिण्याचे पाणी आणि प्रसादाची उत्तम सोय करण्यात आली.या उपक्रमासाठी मंदिराचे अध्यक्ष अशोक आप्पा वाडकर, सचिव मिलिंद झमकडे, विश्वनाथ हुगे, पवन मिटकरी, शुभम नवघरे, शाम राऊत, जगन्नाथाप्पा चाकोते, बबनआप्पा झमकडे, रामदास पाटील, बसवेश्वर गरुड, प्रकाश साखरे आणि गणेश केशरखाने यांनी परिश्रम घेतले.दरम्यान, शहरातील महेशनगर भागातील श्री साईबाबा मंदिरातील श्री महेश्वर लिंग भगवान यांच्या दर्शनासाठी भाविकांच्या रांगा लागल्या होत्या. महाशिवरात्री निमित्त विविध कार्यक्रम आयोजित करण्यात आले होते.
