सेलूतील स्टेट बँक ऑफ इंडियाच्या शाखेला भेट देऊन बँकिंग प्रणालीचा घेतला अनुभव
सेलू : गौरव सेवाभावी संस्था संचलित यासेर उर्दू प्राथमिक शाळेच्या इयत्ता सातवीच्या विद्यार्थ्यांनी जवाहर रोड येथील स्टेट बँक ऑफ इंडियाच्या शाखेला भेट देऊन बँकिंग कामकाजाचा प्रत्यक्ष अनुभव घेतला.
शालेय पाठ्यपुस्तकातील बँक, खाते, कर्ज आणि बचत या घटकांचे प्रात्यक्षिक ज्ञान मिळावे या उद्देशाने या उपक्रमाचे आयोजन करण्यात आले होते. यावेळी बँकेच्या विविध विभागांची आणि कामकाजाची माहिती विद्यार्थ्यांनी कुतूहलाने जाणून घेतली.या भेटीदरम्यान बँकेतील अधिकारी वर्गांनी विद्यार्थ्यांना बँकिंग प्रणाली, विविध प्रकारचे खाते, कर्जाचे प्रकार, व्याजदर आणि शासनाच्या विविध योजनांची सविस्तर माहिती दिली. प्रत्येक टेबलावर चालणाऱ्या कामाचे स्वरूप विद्यार्थ्यांनी जवळून पाहिले. या प्रसंगी विद्यार्थ्यांनी आपल्या मनातील विविध प्रश्न विचारून शंकांचे निरसन करून घेतले. बँकेच्या मॅनेजर यांनी विद्यार्थ्यांना विशेष मार्गदर्शन करत सहकार्य केले. शाळेच्या वतीने सर्व बँक कर्मचाऱ्यांचे पुष्पगुच्छ देऊन स्वागत करण्यात आले.या उपक्रमात शाळेचे मुख्याध्यापक पठाण जावेद खान, वर्गशिक्षिका पठाण नजमा आणि नफिसा बाजी सहभागी होत्या. बँकेच्या कामकाजाच्या व्यस्त वेळेव्यतिरिक्त शालेय विद्यार्थ्यांना वेळ देऊन मार्गदर्शन केल्याबद्दल शाळेच्या वतीने बँकेचे आभार मानण्यात आले. या उपक्रमामुळे विद्यार्थ्यांना शालेय पुस्तकातील ज्ञानासोबतच व्यवहार ज्ञानाची मोठी शिदोरी मिळाली आहे.
