प्रणव सुरवसे आणि गौरांग पाटील यांचे यश
सेलू/प्रतिनिधी : परभणी अस्ट्रोनॉमिकल सोसायटीच्या वतीने राष्ट्रीय विज्ञान दिनानिमित्त आयोजित करण्यात आलेल्या विज्ञानवारी पात्रता पूर्व परीक्षा २०२६ मध्ये सेलू येथील भा.शि.प्र.संस्था अंबाजोगाई संचलित, विवेकानंद विद्यालयाच्या विद्यार्थ्यांनी घवघवीत यश संपादन केले आहे.
तालुकास्तरावर घेण्यात आलेल्या या परीक्षेतून विद्यालयातील दोन विद्यार्थ्यांची आता तृतीय फेरीसाठी म्हणजेच जिल्हास्तरीय प्रात्यक्षिक परीक्षेसाठी निवड करण्यात आली आहे.या परीक्षेत उत्कृष्ट कामगिरी करत प्रणव विठ्ठल सुरवसे आणि गौरांग निलेश पाटील या विद्यार्थ्यांनी आपले स्थान निश्चित केले आहे. त्यांच्या या यशाने विद्यालयाच्या शिरपेचात मानाचा तुरा रोवला गेला असून, ग्रामीण भागातील विद्यार्थ्यांमध्ये विज्ञानाची ओढ निर्माण होत असल्याचे दिसून येत आहे. या यशाबद्दल संस्थेचे पदाधिकारी हरिभाऊ चौधरी, उपेंद्र बेल्लूरकर, करुणा कुलकर्णी, मुख्याध्यापक नामदेव एकशिंगे आणि अनिल कौसडीकर यांनी विद्यार्थ्यांचे विशेष कौतुक केले आहे. या निवडीबद्दल सर्व स्तरांतून विद्यार्थ्यांवर अभिनंदनाचा वर्षाव होत आहे.
