सेलू तालुक्यात ‘छत्रपती शिवाजी महाराज महाराजस्व समाधान शिबीर’

वालूर आणि कुपटा येथे महसूल विभागाच्या वतीने विशेष शिबिरांचे आयोजन; नागरिकांनी लाभ घेण्याचे आवाहन

सेलू / प्रतिनिधी : महाराष्ट्र शासनाच्या महसूल व वन विभागाच्या वतीने महसूल विभागाशी संबंधित सेवा तळागाळातील लोकांपर्यंत प्रभावीपणे पोहोचवण्यासाठी ‘छत्रपती शिवाजी महाराज महाराजस्व समाधान शिबीर अभियान – टप्पा १’ चे आयोजन करण्यात आले आहे.

या अभियानांतर्गत सेलू तालुक्यातील ग्रामीण भागातील सर्वसामान्य नागरिक, शेतकरी, महिला आणि विद्यार्थ्यांपर्यंत शासकीय योजनांचे लाभ पोहोचवण्यासाठी विशेष जनजागृती व प्रसार मोहीम तीव्र स्वरूपात राबवण्यात येणार आहे.या अभियानांतर्गत तालुक्यातील दोन मुख्य ठिकाणी भव्य शिबिरांचे नियोजन करण्यात आले आहे. पहिले शिबीर शनिवार, दिनांक ७ मार्च २०२६ रोजी वालूर महसूल मंडळांतर्गत दुर्गादेवी बाजार मैदान, वालूर येथे पार पडेल. त्यानंतर दुसरे शिबीर शनिवार, दिनांक १४ मार्च २०२६ रोजी कुपटा महसूल मंडळांतर्गत जिल्हा परिषद शाळा, कुपटा येथे आयोजित करण्यात आले आहे.शिबिरात मिळणारे प्रमुख लाभ व सुविधा :या समाधान शिबिरामध्ये नागरिकांना एकाच ठिकाणी अनेक शासकीय सेवांचा लाभ घेता येणार आहे. यामध्ये प्रामुख्याने रहिवासी प्रमाणपत्र, उत्पन्न प्रमाणपत्र आणि नॉन-क्रिमिलेअर यांसारखी विविध आवश्यक प्रमाणपत्रे दिली जातील. शेतीशी संबंधित कामांसाठी ‘ॲग्रीस्टॅक’ अंतर्गत शेतकरी नोंदणी करणे आणि प्रलंबित नोंदणीस मान्यता देण्याची कार्यवाही केली जाईल.तसेच, पीएम किसान योजनेअंतर्गत नवीन लाभार्थी अर्ज स्वीकारणे, लँड सिडिंगच्या त्रुटी दूर करणे आणि लाभार्थ्यांच्या अडचणींचे निराकरण करण्यात येईल. शिधापत्रिका (रेशन कार्ड) संदर्भात नवीन नावे नोंदवणे, कमी करणे किंवा ऑनलाईन दुरुस्तीची कामेही याठिकाणी होतील. सामाजिक अर्थसहाय्य योजनांच्या लाभार्थ्यांचे अर्ज स्वीकारून त्यांची डीबीटी (DBT) प्रक्रिया पूर्ण करून घेण्यावर भर दिला जाणार आहे.७/१२ उतारा व जमीन महसूल सुधारणा :विशेष म्हणजे ‘जिवंत ७/१२’ मोहिमेअंतर्गत मयत खातेदारांच्या वारसांची नावे ७/१२ उताऱ्यावर लावणे आणि प्रलंबित फेरफार निकाली काढून जागीच ७/१२ चे वाटप केले जाणार आहे. यासोबतच महाभूमी पोर्टलवरून डिजिटल ७/१२ डाउनलोड करण्याचे प्रात्यक्षिक नागरिकांना दिले जाईल. तुकडेबंदी कायद्याच्या संदर्भात १५ नोव्हेंबर १९६५ ते १५ ऑक्टोबर २०२४ या कालावधीतील कमी क्षेत्राच्या जमिनींचे व्यवहार नियमित करण्याबाबतही कार्यवाही केली जाईल. जमिनीच्या अकृषिक (NA) वापराबाबत महसूल अधिनियमात झालेल्या बदलांची माहितीही या शिबिरात दिली जाणार आहे.तहसीलदार डॉ. शिवाजी मगर यांनी तालुक्यातील नागरिकांना आवाहन केले आहे की, ज्या नागरिकांना या योजनांचा लाभ घ्यायचा आहे, त्यांनी योजनानिहाय आवश्यक कागदपत्रांच्या प्रतींसह या शिबिरात मोठ्या संख्येने सहभागी व्हावे. या मोहिमेची माहिती प्रत्येक गावातील ग्रामपंचायत आणि तलाठी कार्यालयाच्या नोटीस बोर्डावर प्रसिद्ध करण्याचे निर्देशही देण्यात आले आहेत.