३० मार्चपासून प्रारंभ, शिवमहापुराण कथेसह विविध कार्यक्रमांचे आयोजन
सेलू जि.परभणी : अखिल भारतीय सोमवंशीय क्षत्रिय कासार समाजाची कुलस्वामिनी श्रीक्षेत्र निनगुर (नेकनूर, ता.जि.बीड) येथील श्री कालिकादेवीच्या सुवर्ण महोत्सवी वार्षिक यात्रा उत्सवास ३० मार्चपासून सुरुवात होत आहे. यानिमित्ताने सोमवार ३० मार्च ते गुरुवार २ एप्रिल २०२६ या कालावधीत विविध धार्मिक, सामाजिक आणि सांस्कृतिक कार्यक्रमांचे आयोजन करण्यात आले आहे. देवस्थानचे अध्यक्ष शिवाजीराव काटकर व सचिव डॉ.सोनाजीराव पाटील यांनी ही माहिती दिली आहे.
यात्रा उत्सवाच्या काळात दररोज सकाळी ६ वाजता सप्तशती पाठ, ७ वाजता अभिषेक आरती आणि ९ वाजता अल्पोपहाराचे आयोजन करण्यात आले आहे. सायंकाळी ७ वाजता आरती, नैवेद्य आणि आराधना महाप्रसाद होईल. दुपारी २ वाजता श्रीधाम वृंदावन येथील बालव्यास अर्पित कृष्णदास महाराज यांच्या शिव महापुराण कथेचे आयोजन करण्यात आले आहे. मुख्य दिवस असलेल्या चैत्र शुद्ध पौर्णिमेला म्हणजेच २ एप्रिल रोजी दुपारी ४ वाजता वार्षिक सर्वसाधारण सभा आयोजित करण्यात आली आहे. या सभेच्या अध्यक्षस्थानी घोटण देवस्थानचे खजिनदार रमेश रासने राहणार असून दिलीप साळवे, वैशाली झरकर, डॉ.अरविंद लोखंडे, रावसाहेब पाटील आणि जयश्री कंदले आदींसह मान्यवर उपस्थित राहणार आहेत. गुरुवारी रात्री १० वाजता श्रींचा छबीना निघणार असून, रात्री १२ वाजता आतषबाजीने यात्रेची सांगता होईल. भाविकांनी दर्शनाचा आणि महाप्रसादाचा लाभ घ्यावा, असे आवाहन देवस्थानचे अध्यक्ष शिवाजीराव काटकर, सचिव डॉ.सोनाजीराव पाटील, बंडू निनगुरकर, गणेश कासार, अशोक निनगुरकर, किशोर निनगुरकर, रामनाथ पाथरकर, अरुण व्यवहारे आणि अनिल गोसावी यांसह देवस्थान पदाधिकारी व सदस्य यांनी केले आहे.
वृत्तसंकलन : बाबासाहेब हेलसकर
