सलग १८ तास वाचन, सामान्य ज्ञान स्पर्धा, व्याख्यान, भीमगीतांचा कार्यक्रम
सेलू जि.परभणी : भारतरत्न डॉ.बाबासाहेब आंबेडकर सार्वजनिक जयंती उत्सव समितीच्या वतीने सेलू येथे पाच एप्रिलपासून विविध सामाजिक व सांस्कृतिक कार्यक्रमांचे आयोजन करण्यात आले आहे. समितीचे स्वागताध्यक्ष तथा नगराध्यक्ष मिलिंद सावंत, अध्यक्ष सुबोध काकडे यांनी ही माहिती दिली.
या संदर्भात नुकतीच नियोजन बैठक पार पडली. बैठकीस परभणीचे पोलीस अधीक्षक रवींद्रसिंह परदेशी यांनी भेट देऊन सुसंवाद साधला. पोलीस निरीक्षक दिपक बोरसे यांची उपस्थिती होती. रविवार, ५ एप्रिल रोजी सकाळी सहा ते रात्री दहा वाजेपर्यंत नूतन विद्यालयातील गिल्डा सभागृहात सलग अठरा तास वाचन उपक्रम राबविला जाणार आहे. १२ एप्रिल रोजी सकाळी अकरा वाजता छत्रपती शिवाजी महाराज, महात्मा ज्योतिबा फुले, सावित्रीमाई फुले, राजर्षी शाहू महाराज, डॉ. बाबासाहेब आंबेडकर, साहित्यरत्न अण्णाभाऊ साठे यांच्या जीवन कार्यावर आधारित तालुकास्तरीय सामान्यज्ञान स्पर्धा परीक्षा घेण्यात येणार आहे. इयत्ता पाचवी ते सातवी, आठवी ते दहावी व अकरावी ते पदव्युत्तर या तीन गटात ही स्पर्धा होणार आहे. स्पर्धत सहभागासाठी मुख्याध्यापक सिध्दार्थ एडके (९५६१८७४०६३), गंगाधर अवचार ( ८००७५८१९९१), प्रा. सुमेध आवटे ( ९४२०४३२३८८ ) यांच्याकडे पाच एप्रिल पर्यंत नोंदणी करावी. मंगळवार, १४ एप्रिल रोजी शहरातील नगरपरिषदेच्या समोरील डॉ.बाबासाहेब आंबेडकर यांच्या पुतळ्यास अभिवादन करून सकाळी आठ वाजता सामुहिक बुध्द वंदना होणार आहे. २० एप्रिल रोजी साई नाट्यगृहात सायंकाळी सहा वाजता प्रसिद्ध विचारवंत उत्तम कांबळे (नाशिक) यांचे व्याख्यान होणार आहे. डॉ.बाबासाहेब आंबेडकर यांच्या पुतळ्याजवळ २४ एप्रिल रोजी सायंकाळी सात वाजता प्रसिद्ध गायिका कडूबाई खरात यांच्या भीमगीत गायनाचा कार्यक्रम होईल. सर्व कार्यक्रमास उपस्थित राहावे असे आवाहन उत्सव समिती आणि संयोजकांनी केले आहे.
