राज्य परीक्षा परिषदेचे ‘आयबीपीएस’ला पत्र
परभणी : महाराष्ट्र शिक्षक पात्रता परीक्षा (महाटेट) २०२६ च्या आयोजनाबाबत एक महत्त्वाची माहिती समोर आली आहे. महाराष्ट्र राज्य परीक्षा परिषदेने या परीक्षेचे ऑनलाईन आयोजन करण्यासाठी ‘आयबीपीएस’ (IBPS) या गोपनीय संस्थेला २ जुलैरोजी पत्र पाठवून विनंती केली आहे. ही परीक्षा अधिक सुरक्षित व पारदर्शक पद्धतीने पार पाडावी, यासाठी शासन निर्देशानुसार ही पावले उचलण्यात येत आहेत.
यापूर्वी ही परीक्षा २८ जून २०२६ रोजी आयोजित करण्यात आली होती. या परीक्षेसाठी राज्यातील सर्व जिल्ह्यांमधून पेपर क्रमांक १ साठी २,५८,०६१ आणि पेपर क्रमांक २ साठी ३,४२,०६४ अशा एकूण ६,००,१२५ परीक्षार्थींनी ऑनलाईन पद्धतीने अर्ज भरले होते. परीक्षा सुरळीत घेण्यासाठी राज्यभरात एकूण १,७२१ परीक्षा केंद्रे निश्चित करण्यात आली होती. मात्र, एका जाहीर प्रकटनाद्वारे ही २८ जून रोजी होणारी परीक्षा पुढे ढकलण्यात आली आहे.
सर्वोच्च न्यायालयाने १ सप्टेंबर २०२५ रोजी दिलेल्या एका महत्त्वपूर्ण निर्णयानुसार, सेवेतील शिक्षकांना टीईटी (TET) परीक्षा उत्तीर्ण होणे अनिवार्य करण्यात आले आहे. तसेच सेवेत असणाऱ्या शिक्षकांना ही परीक्षा उत्तीर्ण होण्यासाठी सन २०२८ पर्यंत मुदत देण्यात आली आहे. या पार्श्वभूमीवर, आता ही परीक्षा वर्षातून किमान दोनदा घेण्याचे प्रस्तावित करण्यात आले आहे.
पुढे होणाऱ्या सर्व परीक्षा ऑनलाईन कार्यपद्धतीचा अवलंब करून घ्यायच्या असल्याने, महाराष्ट्र राज्य परीक्षा परिषदेचे आयुक्त महेश चोथे यांनी आयबीपीएस संस्थेला ही परीक्षा शक्य तितक्या लवकर, सुरक्षितरीत्या आणि पारदर्शकपणे आयोजित करण्याची विनंती केली आहे. या निर्णयामुळे लाखो परीक्षार्थींना आता ऑनलाईन पद्धतीने परीक्षा देण्याची तयारी करावी लागणार आहे.
