आठवी शिष्यवृत्ती परीक्षेत समर्थ तेलभरे राज्यात प्रथम, तेजश्री द्वितीय, तर सृष्टी तृतीय क्रमांकावर, पाचवीच्या दोन विद्यार्थ्यांचा समावेश
सेलू जि.परभणी : महाराष्ट्र राज्य परीक्षा परिषदेच्या वतीने आयोजित इयत्ता आठवीच्या शिष्यवृत्ती परीक्षेतसीबीएसई, सीआयएससीई आणि आयएससी शाळांमधून सेलू (जि.परभणी) येथील एल.के.आर रोडगे प्रिन्स इंग्लिश स्कूल अँड ज्युनिअर कॉलेजच्या विद्यार्थ्यांनी राज्य गुणवत्ता यादीत गुणानुक्रमे पहिल्या तीनही क्रमांकासह अव्वल स्थान पटकावले आहे.
इयत्ता आठवी शिष्यवृत्ती परीक्षेत राज्य गुणवत्ता यादीत समर्थ अनंत तेलभरे (९२.६१ टक्के) याने प्रथम, तेजश्री महेशकुमार चौधरी (९१.२७ टक्के) द्वितीय, सृष्टी गोविंद कदम (९०.६० टक्के) तृतीय, तर समर्थ श्याम मचाले (८८.५९ टक्के) याने सहावा क्रमांक पटकावला आहे. आणि इयत्ता पाचवी शिष्यवृत्ती परीक्षेत चंद्रशेखर गायकवाड याने राज्य गुणवत्ता यादीत १० वा, तर समर्थ सुरवसे याने १५ वा क्रमांक मिळवून शाळेच्या यशात आणखी भर घातली.विशेष म्हणजे, या परीक्षेत शाळेचे एकूण २४ विद्यार्थी शिष्यवृत्तीस पात्र ठरले आहेत. यशस्वी विद्यार्थी, पालक आणि मार्गदर्शक शिक्षकांचे श्रीराम प्रतिष्ठानचे संस्थापक अध्यक्ष डॉ. संजय रोडगे, सचिव डॉ.सविता रोडगे, डॉ.आदित्य रोडगे, मुख्याध्यापक मीरा मिरिंडा तसेच सर्व शिक्षक व शिक्षकेतर कर्मचारी यांच्यासह विविध स्तरांतून अभिनंदन होत आहे.
या यशाबद्दल बोलताना संस्थेचे संस्थापक अध्यक्ष डॉ. संजय रोडगे म्हणाले की, हे यश केवळ विद्यार्थ्यांचे नाही, तर पालकांचा विश्वास, शिक्षकांचे समर्पण आणि संस्थेच्या गुणवत्तापूर्ण शिक्षणाच्या ध्येयाचे आहे. विद्यार्थ्यांच्या सर्वांगीण विकासासाठी आधुनिक शिक्षण, स्पर्धा परीक्षा मार्गदर्शन आणि मूल्याधिष्ठित शिक्षण यांचा समन्वय साधण्याचा आमचा सातत्यपूर्ण प्रयत्न आहे.
