नूतन विद्यालय शिक्षण संस्थेत गैरकारभाराचा आरोप, नूतन इंग्लिश स्कूलचे नाव बदलेपर्यंत उपोषणावर ठाम
सेलू : सेलू येथील नूतन शिक्षण संस्थेत गैरकारभार होत असल्याचा आरोप करीत कीर्तनकार प्रसाद महाराज काष्टे (काजळी रोहिणा ता. सेलू) यांनी गुरुवारपासून (१३ ऑगस्ट) नूतन विद्यालयाच्या प्रवेशद्वारावर बेमुदत उपोषण सुरू केले आहे. नूतन इंग्लिश स्कूलला दिलेले बाहेती बिहाणी नाव काढून टाकावे या प्रमुख मागणीसह संस्थेतील कथित बोगस शिक्षक भरती, पावती न देता मनमानी फी वसुली, माहिती अधिकारात मागितलेली माहिती न देणे आदींवरून काष्टे उपोषणाला बसले आहेत.
यासंदर्भात उपोषणस्थळी शुक्रवारी, १४ ऑगस्ट रोजी दुपारी पत्रकार परिषद घेऊन त्यांनी आपली भूमिका रोखठोकपणे सविस्तर स्पष्ट केली. दिलेल्या निवेदनातील मागण्यांवर संस्थेने तातडीने कार्यवाही करावी. माझे मुद्दे चुकीचे असतील वा मी चुकत असेल तर, तसे सिद्ध करून दाखवावे. याप्रकरणी प्रसंगी एक पाऊल मागे येऊ; पण नूतन इंग्लिश स्कूलचे नाव बदलण्यावर ठाम असल्याचे मत त्यांनी व्यक्त केले. आगामी काळात अन्य मागण्यांवरही लढा सुरूच राहणार असल्याचे त्यांनी स्पष्ट केले. मागील दीड महिन्यापासून समाज माध्यमातून नूतन शिक्षण संस्थेतील अनागोंदी कारभाराविषयी म्हणणे मांडत आहे. त्याला समाजातून सकारात्मक प्रतिसाद आहे. संस्थाचालकांची तीन वेळा भेट घेतली. मात्र मागितलेली माहिती मिळाली नाही, असे त्यांनी सांगितले.
नूतन शिक्षण संस्थेत सेलू शहराचे भाग्यविधाते कै. श्रीरामजी भागडिया, स्वातंत्र्य सेनानी विनायकराव चारठाणकर यांच्यापेक्षा कोणाचेही योगदान मोठे नाही. त्यांच्या नावाचा विचार न होता बिहाणी बाहेती यांचे इंग्लिश स्कूलला नाव देऊन संस्थेने सेलूकरांवर अन्याय केलेला आहे. याची चौकशी शिक्षण विभागाच्या मार्फत केली असता, त्यांच्याकडूनदेखील केवळ आश्वासनच मिळाले आहे. नूतन इंग्लिश स्कूलचे नाव बदलेपर्यंत उपोषणावर ठाम असल्याची भूमिका काष्टे यांनी व्यक्त केली आहे. दरम्यान, बाबासाहेब साखरे हेही या उपोषणात सहभागी झाले आहेत. उपोषणाला विविध क्षेत्रातील नागरिक भेट देत आहेत. दररोज सायंकाळी कीर्तनाचे आयोजन करण्यात आले आहे.
