विभागीयस्तरीय उत्कृष्ट उपजिल्हाधिकारी पुरस्काराबद्दल सन्मान
सेलू | प्रतिनिधी : महाराष्ट्र शासनाच्या वतीने देण्यात येणारा विभागीय उत्कृष्ट उपजिल्हाधिकारी पुरस्कार सेलू येथे कार्यरत असलेले उपविभागीय अधिकारी शैलेश लाहोटी यांना नुकताच छत्रपती संभाजीनगर येथे मंत्री संजय शिरसाट यांच्या हस्ते प्रदान करण्यात आला. या पुरस्काराबद्दल अखिल भारतीय ग्राहक पंचायत, सेलू यांच्या वतीने गुरुवार, दि. २० ऑगस्ट रोजी त्यांचा सत्कार करण्यात आला.
यावेळी अखिल भारतीय ग्राहक पंचायतचे देवगिरी प्रांताध्यक्ष डॉ. विलास मोरे यांच्या हस्ते शैलेश लाहोटी यांचा सत्कार करण्यात आला. कार्यक्रमास सेलू तालुकाध्यक्ष सतीश जाधव, उपाध्यक्ष रवी कुलकर्णी, सचिव गंगाधर कान्हेकर, प्रा. के. डी. वाघमारे, नवल किशोर काबरा, प्रदीप कौसडीकर, सिद्धार्थ गायकवाड, सुनील गायकवाड, नागोराव देशमुख, अशोक काकडे, डॉ. ऋतुराज साडेगावकर, सुखाचार्य शिंदे आदी उपस्थित होते.
यावेळी बोलताना डॉ. विलास मोरे यांनी सांगितले की, “कल्याणकारी अर्थव्यवस्था, लोकाभिमुख प्रशासन आणि शोषणमुक्त समाज” या त्रिसूत्रीच्या अंतर्भूत संकल्पनेतून अखिल भारतीय ग्राहक पंचायत सातत्याने कार्यरत आहे. शासन व्यवस्थेत लोकाभिमुख प्रशासनाला प्राधान्य देत सर्वसामान्य नागरिकांच्या हितासाठी कार्य करणाऱ्या अधिकारी व कर्मचाऱ्यांच्या कार्याची दखल घेऊन त्यांचा सन्मान करण्याची परंपरा ग्राहक पंचायतीने जपली आहे. उत्कृष्ट उपजिल्हाधिकारी पुरस्काराने सन्मानित झाल्याबद्दल शैलेश लाहोटी यांचे सर्व स्तरातून अभिनंदन होत आहे.
