श्रावणमासातील आध्यात्मिक जागराची २२ वर्षांची परंपरा
सेलू : सेलू येथील श्री केशवराज बाबासाहेब महाराज संस्थान आणि श्री ज्ञानेश्वरी आराधना प्रतिष्ठान यांच्या संयुक्त विद्यमाने श्रावणमासानिमित्त आयोजित श्रीमद् ग्रंथराज ज्ञानेश्वरी प्रवचनमालेला भाविकांचा उत्स्फूर्त प्रतिसाद मिळाला. शुक्रवारी, ११ सप्टेंबर २०२६ रोजी सुनील महाराज आष्टीकर यांचे काल्याचे कीर्तन, महाप्रसाद आणि नामदेव महाराज ढवळे चारठाणकर यांच्या प्रवचनाने महिनाभर चाललेल्या या प्रवचन उत्सवाची उत्साहात सांगता झाली.
या उपक्रमाचे यंदा २२ वे वर्ष होते. करोना काळातही ऑनलाईन चाललेल्या या प्रवचनमालेतून आध्यात्मिक जागराची परंपरा अविरत सुरू आहे. आयोजनातील सुटसुटीतपणा, वेळेचे पालन आणि सेवाभावी मूल्ये याद्वारे या उपक्रमाने सेलूच्या आध्यात्मिक आणि सांस्कृतिक क्षेत्रातील वेगळेपण आजही जपले आहे.
यावर्षी गुरुवार, १३ ऑगस्ट २०२६ रोजी रघुनाथ सोन्नेकर यांच्या प्रवचनाने सुरुवात झाली. दररोज रात्री ८ ते ९ या वेळेत पंचक्रोशीतील तसेच छत्रपती संभाजीनगर, जालना, नांदेड, बीड, माजलगाव, केज, परभणी, मानवत, मेहकरसह विविध भागांतील नामवंत अभ्यासक व प्रवचनकारांनी ज्ञानेश्वरीवर समाज प्रबोधन केले. ५ सप्टेंबर ते ११ सप्टेंबर २०२६ दरम्यान दररोज सकाळी ७ ते १० या वेळेत श्रीमद् ज्ञानेश्वरी पारायण सोहळा पार पडला. वाचन गुलाबराव लहाने गुरुजी यांनी केले. उत्सवासाठी श्री केशवराज बाबासाहेब मंदिर संस्थान आणि ज्ञानेश्वरी आराधना मंडळाच्या सेवेकर्यांनी पुढाकार घेतला.
