‘सीरत-ए-मुस्तफा’ निमित्त गुणवंत शिक्षकांसह माजी विद्यार्थ्यांचा गौरव
सेलू : परभणी एज्युकेशन सोसायटी संचालित डॉ. झाकीर हुसेन प्राथमिक शाळा सेलू येथे शिक्षक दिनाचे औचित्य साधून ‘सीरत-ए-मुस्तफा’, माजी विद्यार्थ्यांचा सत्कार आणि ‘बेस्ट टीचर’ पुरस्कार प्रदान सोहळा शनिवार, १२ सप्टेंबर रोजी सेलू शहरातील माशा अल्लाह फंक्शन हॉल येथे उत्साहात पार पडला.
कार्यक्रमाची सुरुवात इयत्ता सातवीचा विद्यार्थी अनस खुरशीद शेख याच्या पवित्र कुराण पठणाने झाली. यानंतर शाह आलम याने अनुवाद सादर केला. इयत्ता सहावीची विद्यार्थिनी आयेशा कमर चाऊस हिने हम्द (ईश्वर प्रार्थना) तर इयत्ता सातवीची विद्यार्थिनी शाफिया अल्ताफ हिने नात सादर केली.कार्यक्रमाच्या अध्यक्षस्थानी मदिना मस्जिदचे खतीब व इमाम मौलाना मोहम्मद रईस कासमी हे होते, तर प्रमुख पाहुणे म्हणून परभणी येथील सय्यद गुलाम मोहम्मद हुसेन उपस्थित होते.
याप्रसंगी इसहाक मामू, मोहम्मद जलील, राहत बँक सेलूचे व्यवस्थापक शेख कलीम बेलदार, बेलदार समाज सेवा मंडळाचे जिल्हाध्यक्ष शैलेजा उर्दू शाळेचे मुख्याध्यापक मोहम्मद इरफान, सय्यद जिलानी, मजहर खान, सय्यद मुनीर यांच्यासह विविध क्षेत्रांतील मान्यवर उपस्थित होते. प्रास्ताविक करताना मुख्याध्यापक मोहम्मद अब्दुल अलीम सोफी यांनी शिक्षकांचे महत्त्व अधोरेखित करत, “विद्यार्थ्यांना केवळ शालेय शिक्षण देणे म्हणजे शिक्षक नव्हे, तर त्यांच्यात नैतिक मूल्ये, आई-वडिलांचा व शिक्षकांचा आदर आणि सामाजिक जबाबदारीची जाणीव निर्माण करणे हे शिक्षकांचे खरे कर्तव्य आहे,” असे प्रतिपादन केले.
यावेळी इयत्ता पहिली ते सातवीच्या विद्यार्थ्यांनी उर्दू, मराठी आणि इंग्रजी या तिन्ही भाषांमधून सीरत-ए-मुस्तफा यांच्या जीवनावर प्रभावी विचार मांडले.शाळेची माजी विद्यार्थिनी सय्यदा आयेशा सय्यद जिलानी हिची एमबीबीएस वैद्यकीय अभ्यासक्रमासाठी निवड झाल्याबद्दल तिचा व तिच्या पालकांचा विशेष सत्कार करण्यात आला. तसेच मरियम जहाँ मजहर खान (आलिमा कोर्स पूर्ण) आणि राहन फातिमा मजहर खान (डीएमएलटी कोर्स पूर्ण) यांच्यासह बीयूएमएस, बीएचएमएस, अभियांत्रिकी आणि शिक्षण क्षेत्रात यश संपादन केलेल्या माजी विद्यार्थ्यांचा गौरव करण्यात आला.शैक्षणिक वर्षातील उत्कृष्ट कामगिरीबद्दल शाळेतील गुणवंत शिक्षकांना शाल, पुष्पहार, प्रमाणपत्र आणि स्मृतिचिन्ह देऊन ‘बेस्ट टीचर’ पुरस्काराने सन्मानित करण्यात आले. हाफेज मोहम्मद जुनेद नदवी यांनी आभार मानले. या सोहळ्यास शिक्षक, विद्यार्थी, पालक आणि नागरिक मोठ्या संख्येने उपस्थित होते.
