श्री शिवाजी विधी महाविद्यालयात २८ वा दीक्षांत समारंभ उत्साहात; मान्यवरांकडून कौतुक
परभणी, दि.२२ : परभणी जिल्ह्यातील प्रसिद्ध विधीज्ञ कुणाल गौतम कांबळे यांनी कायद्याच्या क्षेत्रातील पदव्युत्तर पदवी (LL.M.) संपादन केल्याबद्दल त्यांना स्वामी रामानंद तीर्थ मराठवाडा विद्यापीठ, नांदेड आणि म.शि.प्र. मंडळ संचालित श्री शिवाजी विधी महाविद्यालय, परभणी यांच्या संयुक्त विद्यमाने आयोजित २८ व्या दीक्षांत समारंभात पदवी प्रमाणपत्र प्रदान करून सन्मानित करण्यात आले.
या सोहळ्याच्या अध्यक्षस्थानी श्री शिवाजी विधी महाविद्यालयाचे प्राचार्य डॉ. एम. एल. धर्मापुरीकर, होते. प्रमुख अतिथी म्हणून जिल्हा व सत्र न्यायालय, परभणीचे मुख्य जिल्हा न्यायाधीश आर. एम. सादराणी यांची विशेष उपस्थिती लाभली.कार्यक्रमास स्वामी रामानंद तीर्थ मराठवाडा विद्यापीठाचे व्यवस्थापन परिषद सदस्य नारायण चौधरी तसेच महाविद्यालय विकास समितीचे सदस्य चंद्रशेखर नव्हाते यांची प्रमुख उपस्थिती होती. यासोबतच महाविद्यालय विकास समितीचे सर्व सन्माननीय सदस्य, प्राध्यापकवर्ग, शिक्षक व शिक्षकेतर कर्मचारी आणि विधी शाखेतील विद्यार्थी व मित्रपरिवार उपस्थित होते.ॲड. कुणाल गौतम कांबळे यांच्या शैक्षणिक यशाचा हा क्षण त्यांच्या जिद्द, मेहनत, सातत्य आणि विधी क्षेत्राप्रती असलेल्या समर्पणाची पावती ठरला. पदव्युत्तर शिक्षण पूर्ण करून त्यांनी आपल्या शैक्षणिक वाटचालीत आणखी एक महत्त्वाचा टप्पा गाठला आहे. यावेळी उपस्थित मान्यवरांनी ॲड. कांबळे यांचे अभिनंदन करून त्यांच्या पुढील न्यायिक, सामाजिक आणि विधी क्षेत्रातील वाटचालीस शुभेच्छा दिल्या.
