सेलूतील ब्रह्माकुमारी ईश्वरीय विश्व विद्यालयाचा उपक्रम
सेलू : प्रजापिता ब्रह्माकुमारी ईश्वरीय विश्व विद्यालय, शाखा सेलू येथे जगदंबा मातेश्वरीजी यांच्या स्मृती प्रीत्यर्थ १७ जून ते २२ जून २०२६ या कालावधीत आयुर्वेदिक ॲक्यूप्रेशर थेरपी शिबिराचे आयोजन करण्यात आले आहे. सकाळी ८ ते १२ आणि संध्याकाळी ४ ते ८ या वेळेत हे शिबिर असून या शिबिरात जोधपूर (राजस्थान) येथील प्रसिद्ध थेरपिस्ट प्रमोद कुमार आणि त्यांचे सहकारी उपचार करणार आहेत.
या थेरपीद्वारे शरीरातील दडलेले बिंदू सक्रिय करून नैसर्गिक व सुरक्षित पद्धतीने आरोग्य सुधारण्याची संधी नागरिकांना मिळणार आहे. शिबिराचा लाभ घ्यावा, असे आवाहन करण्यात आले आहे.
विविध आजारांवर होणार उपचार : या सहा दिवसीय शिबिरामध्ये आधुनिक जीवनशैलीमुळे उद्भवणाऱ्या अनेक आजारांवर ॲक्यूप्रेशर पद्धतीद्वारे मार्गदर्शन व उपचार केले जातील. यामध्ये प्रामुख्याने डोकेदुखी, मायग्रेन, मान, खांदा आणि पाठदुखी, गुडघेदुखी तसेच सांधेदुखीच्या त्रासातून आराम मिळण्यास मदत होईल. याशिवाय आम्लपित्त, पित्त, पचनाचे विकार, गॅस, थकवा, ॲसिडिटी, अनिद्रा (झोप न येणे) आणि शिरांचे विकार यावरही योग्य उपचार केले जातील.हृदयविकार, संधिवात निवारण, लठ्ठपणा नियंत्रण, डायबिटीझ कंट्रोल व हातापायांना मुंग्या येणे यासारख्या समस्यांवर येथे सल्ला मिळेल. महिलांच्या आरोग्याशी संबंधित बाळंतपण, प्रसूती व मेनोपॉझल समस्या, तसेच श्वसनाचे विकार जसे की अस्थमा, सर्दी, खोकला आणि शरीरातील हार्मोनल असंतुलन यावरही हे शिबिर अत्यंत प्रभावी ठरणार आहे. टी.बी. च्या रुग्णांसाठी पूरक उप-उपचार म्हणूनही ही थेरपी उपयुक्त ठरेल.
