डॉ.बाबासाहेब आंबेडकर जयंतीनिमित्त सेलूमध्ये उपक्रम
महापुरुषांच्या विचारांचे अनुकरण करा : उपजिल्हाधिकारी शैलेश लाहोटी
सेलू : आपले जीवन भविष्य उज्ज्वल होईल असे विचारधन महात्मा ज्योतिबा फुले, भारतरत्न डॉ.बाबासाहेब आंबेडकर तसेच सर्वच महापुरुषांनी दिले आहेत. विद्यार्थ्यांनी महापुरुषांच्या विचारांचे अनुकरण करून आपल्या जीवनाची वाटचाल केली तर त्यांचे जीवन समृद्ध होईल, असे प्रतिपादन सेलू तालुकास्तरीय सामान्यज्ञान स्पर्धा परीक्षेचे उद्घाटक सेलूचे उपजिल्हाधिकारी शैलेश लाहोटी यांनी केले.
सेलू येथील डॉ. बाबासाहेब आंबेडकर सार्वजनिक जयंती उत्सव समितीच्या वतीने स्वागताध्यक्ष तथा नगराध्यक्ष मिलिंद सावंत यांच्या संकल्पनेतील महापुरुषांच्या जीवन कार्यावर आधारित तालुकास्तरीय सामान्यज्ञान स्पर्धेस तालुक्यातील १२०० पेक्षा अधिक विद्यार्थ्यांनी उत्स्फूर्त प्रतिसाद दिला. पाचवी ते सातवी, आठवी ते दहावी आणि अकरावी ते पदव्युत्तर या तीन गटात शहरातील नूतन विद्यालयात रविवारी, १२ एप्रिल रोजी ही स्पर्धा उत्साहात पार पडली. अध्यक्षस्थानी उपविभागीय पोलिस अधिकारी दीपककुमार वाघमारे होते. प्रमुख पाहुणे म्हणून गटविकास अधिकारी उदय जाधव, पोलिस निरीक्षक दीपक बोरसे, कृषी उत्पन्न बाजार समितीचे सभापती डॉ. संजय रोडगे, उपनगराध्यक्ष साईराज बोराडे, भाजपचे तालुकाध्यक्ष गणेश काटकर, शहराध्यक्ष अशोक शेलार, पप्पू डोंबे, सर्जेराव लहाने, रामराव गायकवाड, रामराव बोबडे, बाबासाहेब पावडे यांची उपस्थिती होती.यावेळी बोलताना दीपककुमार वाघमारे यांनी, विद्यार्थ्यांनी अथक परिश्रम, ज्ञान संपादन आणि शिक्षणातून आई-वडील, स्वतःचे आणि सेलूचे नाव मोठे करावे, असे आवाहन केले. प्रास्ताविक समितीचे अध्यक्ष सुबोध काकडे यांनी केले. सूत्रसंचालन डॉ. काशिनाथ पल्लेवाड यांनी केले तर आभार नगराध्यक्ष मिलिंद सावंत यांनी मानले. स्पर्धेसाठी संयोजक व शिक्षकांनी परिश्रम घेतले.
