परभणीत भारतीय जनता पक्ष जिल्हा शाखेच्यावतीने आनंदोत्सव
परभणी : बिहार विधानसभा निवडणूक – २०२५ मध्ये राष्ट्रीय लोकशाही आघाडीतील भारतीय जनता पक्षाने घवघवीत यश मिळविल्याबद्दल येथील छत्रपती शिवाजी महाराज पुतळा परिसरात भारतीय जनता पक्ष जिल्हा शाखेच्यावतीने आनंदोत्सव शुक्रवारी, १४ नोव्हेंबर रोजी जल्लोषात आनंदोत्सव साजरा करण्यात आला.बिहार विधानसभा निवडणुकीत प्रधानमंत्री नरेंद्र मोदी, पक्षाध्यक्ष जगतप्रकाश नड्डा यांच्या नेतृत्वात भारतीय जनता पक्षाने बिहार विधानसभा निवडणुकीत राष्ट्रीय लोकशाही आघाडीच्या माध्यमातून निवडणूक लढवित स्पष्ट बहुमत मिळविले. बिहार विधानसभेच्या सर्व २४३ सदस्यांसाठी निवडणूक पार पडली. शुक्रवारी झालेल्या मतमोजणीत राष्ट्रीय लोकशाही आघाडीला स्पष्ट बहुमत मिळाले. या विजयाबद्दल परभणीत भाजप जिल्हा शाखेच्यावतीने पेढे वाटून आणि घोषणाबाजी करत आनंदोत्सव साजरा करण्यात आला. यावेळी राज्यमंत्री तथा पालकमंत्री मेघना साकोरे – बोर्डीकर, माजी आमदार सुरेश वरपूडकर, पक्षाचे जिल्हाध्यक्ष सुरेश भुमरे, महानगराध्यक्ष शिवाजी भरोसे, डॉ. केदार खटींग, मंगल मुदगलकर आदींसह पक्षाच्या विविध आघाड्यांचे पदाधिकारी व कार्यकर्ते मोठ्या संख्येने उपस्थित होते.
आदरणीय पंतप्रधान नरेंद्रजी मोदी यांच्या नेतृत्वावर विश्वास ठेवत बिहार विधानसभा भारतीय जनता पार्टीने ऐतिहासिक विजय नोंदविला आहे.सर्व विजयी उमेदवार, पदाधिकारी आणि कार्यकर्त्यांचे परभणी भाजपाकडून हार्दिक अभिनंदन होत असल्याची प्रतिक्रिया पालकमंत्री मेघना साकोरे-बोर्डीकर यांनी दिली.
