थरारक रेस्क्यू, जिंतूर तालुक्यातील कौसडी शिवारातील घटना, ग्रामस्थ आणि प्रशासनाच्या अथक परिश्रमाला यश
परभणी : जिल्ह्यातील बोरी (ता.जिंतूर) येथून जवळच असलेल्या कौसडी शिवारातील शेतात बोअरवेलच्या खड्डयात पडलेल्या तीन वर्षीय बालकाला अथक प्रयत्नांनंतर सुखरूप बाहेर काढण्यात ग्रामस्थ आणि प्रशासनाला बुधवारी, १९ ऑगस्ट रोजी यश आले. आदनान नदीम शेख असे या बालकाचे नाव असून त्यास पुढील उपचारासाठी तातडीने परभणी येथील जिल्हा सामान्य रुग्णालयात दाखल करण्यात आले आहे. बुधवारी दुपारी साडेबारा ते एक वाजण्याच्या सुमारास कौसडी शिवारातील गट क्रमांक २५ मध्ये ही घटना घडली.
याबाबत माहिती अशी की, बालक आईसोबत शेतात गेले होते. शेतात कामे सुरू असताना बालक बोअरवेलच्या खड्डयात पडल्याचे निदर्शनास आले. घटना घडल्याचे लक्षात येताच आई व नातेवाईकांनी आरडाओरड केली. त्यानंतर भ्रमणध्वनीद्वारे गावात माहिती देण्यात आली. काही वेळातच ग्रामस्थ घटनास्थळी दाखल झाले. आणि बचाव कार्याला सुरुवात केली. घटनेची माहिती मिळताच आरोग्य, महसूल प्रशासनाच्या अधिकारी, कर्मचाऱ्यांनी घटनास्थळी धाव घेतली. कौसडी, बोरी, जिंतूर तसेच परभणी येथील अधिकारी व कर्मचारी घटनास्थळी दाखल होऊन युद्धपातळीवर रेस्क्यू मोहीम सुरू करण्यात आली. जिल्हा प्रशासनानेही घटनेची गंभीर दखल घेत बचावकार्याला आवश्यक त्या सूचना व मार्गदर्शन केले. जिल्हाधिकारी, मुख्य कार्यकारी अधिकारी, तहसीलदार व नायब तहसीलदार हे स्थानिक प्रशासनाच्या सातत्याने संपर्कात राहून बचावकार्याचा आढावा घेत होते. कौसडीचे सरपंच शेख मोबीन, ग्रामपंचायत सदस्य तसेच ग्रामस्थांनी बचावकार्यात मोठे योगदान दिले. परिसरातील विविध गावांमधून नागरिक मोठ्या संख्येने घटनास्थळी दाखल झाले होते.
तीन वर्षीय शेख अदनान हा बालक बोअरवेलमध्ये पडल्याची घटना बुधवारी सव्वा एकच्या सुमारास घडली. माहिती मिळताच तालुका, जिल्हा प्रशासन, महसूल, पोलिस प्रशासन, आरोग्य विभागाचे पथक यांनी समन्वय साधून तसेच ग्रामस्थांच्या अथक परिश्रमानंतर बालकाची दीड तासात सुटका करण्यात आली. यासाठी परिसरातील लोकप्रतिनिधी आणि नागरिकांनी आवश्यक ती मदत करत मशिनरी उपलब्ध करून दिली. या शिवाय ऑक्सिजनची व्यवस्था करण्यात आली होती. कुटुंबियांशी संपर्कात राहून त्यांचा आत्मविश्वास वाढविला गेला. बोअरवेलच्या दोन्ही बाजूने खड्डे खोदून साधारण दहा फूट खोलीपर्यंत असलेल्या अदनानला सुखरूप बाहेर काढण्यात यश आले. – शैलेश लाहोटी,उपविभागीय अधिकारी, सेलू
