शारदा विद्यालयात व्यवसाय व उद्योजकता मार्गदर्शन प्रशिक्षण सुरू
सेलू : कोणत्याही क्षेत्रात यश संपादन करण्यासाठी शारीरिक, मानसिकदृष्ट्या सुदृढता आणि जीवनात संस्कार, शिस्त अत्यंत गरजेची आहे, असे प्रतिपादन सेलू येथील गटकळ करिअर ॲकडमीचे संचालक प्रा. रामेश्वर गटकळ यांनी केले. संरक्षण दलात करिअरच्या मोठ्या संधी उपलब्ध आहेत, याचा फायदा विद्यार्थ्यांनी घ्यावा, असे त्यांनी नमूद केले.
जिल्हा शिक्षण व प्रशिक्षण संस्था, पंचायत समिती शिक्षण विभाग सेलू आणि राधाबाई किशनराव कान्हेकर शारदा विद्यालय यांच्या संयुक्त विद्यमाने सेलू येथे आयोजित दोन दिवसीय तालुकास्तरीय व्यवसाय व उद्योजकता मार्गदर्शन प्रशिक्षणास २३ मार्च २०२६ रोजी उत्साहात सुरवात झाली.त्यावेळी “संरक्षण दलातील करिअरच्या संधी” या विषयावर मार्गदर्शन करताना प्रा.गटकळ बोलत होते. उद्घाटन समारंभाच्या अध्यक्षस्थानी गटशिक्षणाधिकारी गजानन वाघमारे होते. प्रमुख पाहुणे म्हणून केंद्रप्रमुख एकनाथ जाधव, गटसमन्वयक सुनीता काळे, मुख्याध्यापक डी.डी. शिंदे, सुलभक सु.ल.जोशी, सुभाष मोहकरे, प्रदीप कांबळे, वालूर जिप प्रशालेचे मुख्याध्यापक गणेश वीसपुते यांची उपस्थिती. प्रा.गटकळ म्हणाले, की स्पर्धा परीक्षेसाठी भाषा, गणित, बुद्धिमत्ता आणि सामाजिक शास्त्र विषयावर भर देणे तसेच चालु घडामोडी आणि सामान्यज्ञान अद्ययावत माहिती ठेवणे आवश्यक आहे.
उद्घाटनप्रसंगी श्री. वाघमारे म्हणाले की विद्यार्थी ऊर्जैचे स्रोत आहेत, त्यांच्यामध्ये ज्ञान, क्षमता, व्यवसाय व उद्योजकता कौशल्य वृद्धिंगत करण्याच्या उद्देशाने हे प्रशिक्षण आयोजित करण्यात आले आहे. प्रशिक्षणात एकलव्य सायन्स ॲकडमीचे प्रवीण चव्हाण यांनी, करिअर नियोजन व स्व जाणीव या विषयावर, डॉ.योगेश सावंगीकर यांनी मानसिक आरोग्य व करिअर नियोजन, सु.ल.जोशी यांनी राष्ट्रीय शैक्षणिक धोरण २०२० आराखडा आणि व्यवसाय शिक्षण, तर व्यवसाय शिक्षण अर्थ स्वरूप” यावर सुभाष मोहकरे यांनी मार्गदर्शन केले. प्रशिक्षणात विविध शाळांचे मुख्याध्यापक आणि शिक्षक सहभागी झाले आहेत. सूत्रसंचालन सुभाष मोहकरे यांनी केले. प्रास्ताविक सुनीता काळे यांनी केले. डी.डी.शिंदे यांनी आभार मानले.
