सर्व गटांमध्ये प्रथम क्रमांक मिळवत जिल्हास्तरीय स्पर्धेसाठी पात्रता
सेलू : क्रीडा व युवक सेवा संचनालय, पुणे, जिल्हा क्रीडा अधिकारी कार्यालय, परभणी आणि श्रीराम प्रतिष्ठान, सेलू यांच्या संयुक्त विद्यमाने आयोजित तालुकास्तरीय क्रिकेट स्पर्धेत एल के आर रोडगे प्रिन्स इंग्लिश स्कूलने घवघवीत यश मिळवले आहे. नूतन महाविद्यालय, सेलूच्या मैदानावर २५ आणि २६ सप्टेंबर रोजी ही तालुकास्तरीय क्रिकेट स्पर्धा पार पडली. या स्पर्धेत एल के आर रोडगे प्रिन्स इंग्लिश स्कूलने १७ वर्षाखालील मुले, १७ वर्षाखालील मुली आणि १४ वर्षाखालील मुले अशा सर्व गटामध्ये प्रथम क्रमांक पटकावला. सर्व गटांमध्ये विजेतेपद मिळवून प्रिन्स स्कूलने सेलू तालुक्यात आपले वर्चस्व सिद्ध केले असून, आता त्यांनी जिल्हास्तरीय स्पर्धेसाठी आपली पात्रता निश्चित केली आहे.
या विजयी खेळाडूंना प्रमोद गायकवाड, कपिल ठाकूर आणि सुरज शिंदे यांचे मार्गदर्शन लाभले. प्रिन्स इंग्लिश स्कूलच्या या यशाबद्दल संस्थेचे अध्यक्ष डॉ. संजय रोडगे, सचिव डॉ. सविता रोडगे, प्रशासकीय अधिकारी प्रा. महादेव साबळे, प्राचार्य कार्तिक रत्नाला, प्रगती क्षिरसागर आणि सर्व शिक्षक व शिक्षकेत्तर कर्मचाऱ्यांनी अभिनंदन केले आहे. तसेच, पुढील जिल्हास्तरीय स्पर्धेसाठी त्यांनी खेळाडूंना शुभेच्छा दिल्या आहेत.
