नवरात्रोत्सवाला २५० वर्षांची परंपरा, विविध कार्यक्रमांचे आयोजन
सेलू : सेलू शहराचे ग्रामदैवत असलेल्या शेरे गल्लीतील जगदंबा देवी भाविकांचे मोठे श्रद्धास्थान आहे. या देवीच्या नवरात्रौत्सवाला सोमवार, २२ तारखेपासून उत्साहात प्रारंभ झाला असून, या उत्सवाला सुमारे अडीचशे (२५०) वर्षांची अखंडित परंपरा आहे.
येथील शेरे परिवार हे मातृभक्त असल्याने त्यांनी शेरे गल्लीत जगदंबा देवीचे भव्य मंदिर उभे केले. दरवर्षीप्रमाणे यंदाही हा नवरात्रोत्सव पारंपरिक पद्धतीने साजरा होत आहे. मंदिर संस्थानचे अध्यक्ष संपतराव शेरे, बापूसाहेब शेरे, महादेव शेरे यांच्यासह सर्व संचालक मंडळाच्या वतीने उत्सवात सकाळ आणि सायंकाळी आरती, भजन, गोंधळ, भारूड, वाघ्या मुरळी यांसारखे विविध धार्मिक कार्यक्रम सुरू आहेत. पंचक्रोशीत ख्याती असल्याने सेलू शहरासह परिसरातील महिला व भाविक दर्शनासाठी मोठी गर्दी करत आहेत. नवरात्र उत्सवात भाविकांमध्ये मोठा उत्साह दिसत असून, परडी भरणाऱ्या महिलांसाठी येथे विशेष व्यवस्था करण्यात आली आहे.
जगदंबा देवी स्थापनेची आख्यायिका
या देवीच्या स्थापनेविषयी बापूसाहेब शेरे यांनी आख्यायिका सांगितली. जुन्या काळात सेलू या गावाचे मूळ नाव शाळूवाडी होते, कारण या भागात शाळू (ज्वारी) चे पीक अधिक प्रमाणात घेतले जाई. पुढे शाळूवाडीचा अपभ्रंश होऊन सेलूवाडी आणि नंतर सेलू हे नाव रूढ झाले. अडीचशे वर्षांपूर्वी सेलू शहरात सुभेदारांची गढी होती. त्या पांढऱ्या मातीच्या गढीत जगदंबा देवीची मूर्ती सापडली. शेरे परिवाराने ही मूर्ती शेरे गल्लीतील मंदिरात स्थापित केली. तेव्हापासून नवरात्रौत्सव साजरा करण्याची ही धार्मिक परंपरा शेरे, फोपसे, धापसे, दिग्रसकर, पांडे, कुरेशी यांसारख्या अनेक कुटुंबीयांच्या पुढाकाराने आजतागायत अविरत सुरू आहे.
