सेलूजवळील सोनवटी शिवारातील घटना; पोलिसांकडून शोधमोहीम सुरूच
सेलू : सेलू तालुक्यातील मौजे सोनवटी शिवारात बांधकामावर मजूर म्हणून काम करणारा साजिद मजीद शेख हा १७ वर्षांचा तरुण गुरुवारी सायंकाळी कालव्याच्या पाण्यात वाहून गेल्याची धक्कादायक घटना घडली आहे. रात्रभर शोधमोहीम हाती घेण्यात आली मात्र यश आले नाही. त्यामुळे गुरुवारी सकाळी पुन्हा शोधमोहीम तीव्र केली आहे, अशी माहिती पोलिस निरीक्षक दीपक बोरसे यांनी दिली.राजमोहल्ला भागातील रहिवासी असलेला साजिद हा व्यंकटी धुमाळ यांच्या बांधकामावर कामाला होता. सायंकाळी ५.०० वाजताच्या सुमारास तो शौचास जाण्यासाठी सोनवटी शिवारातील निम्न दुधना प्रकल्पाच्या डाव्या कालव्यापाशी गेला होता. पाणी घेण्यासाठी कालव्यात उतरला असता, त्याचा पाय घसरला आणि पाण्याचा वेग जास्त असल्याने तो प्रवाहाबरोबर वाहून गेला.या दुर्घटनेची माहिती मिळताच सेलू पोलिस ठाणे येथील पथकाने तातडीने घटनास्थळी धाव घेतली. पोलिस उपनिरीक्षक राऊत यांच्यासह पोलिस हवालदार क्रमांक सूर्यवंशी, पोलिस शिपाई आघाव आणि डुबे यांनी शोधमोहीम सुरू केली. या कार्यात सोनवटीचे पोलीस पाटील माणिकराव सोळंके, हातनूरचे पोलीस पाटील रामचंद्र पारवे, स्थानिक ग्रामस्थ आणि तरुणाच्या नातेवाईकांनी मोठ्या प्रमाणावर मदत केली.कालव्यातील पाण्याचा प्रवाह मोठा असल्याने आणि रात्रीच्या वेळी अंधार पसरल्याने शोधकार्यात मोठे अडथळे निर्माण झाले. बराच वेळ शोध घेऊनही साजिदचा पत्ता न लागल्याने रात्री ही मोहीम थांबवण्यात आली होती. गुरुवारी सकाळी पुन्हा पोलिस प्रशासनाने स्वतः घटनास्थळी भेट देऊन शोधमोहीम तीव्र केली आहे. पाण्याचा प्रवाह लक्षात घेऊन पुढील कार्यवाही करण्यात येत असून, अद्याप शोध सुरूच असल्याची माहिती पोलिस निरीक्षक दीपक बोरसे यांनी दिली आहे.
