सोनवटी शिवारातील दुर्दैवी घटना; १८ तासांच्या शोधमोहिमेनंतर हाती लागला मृतदेह
सेलू : कुटुंबाची आर्थिक परिस्थिती हलाखीची असल्याने घराचा उदरनिर्वाह भागविण्यासाठी काबाडकष्ट करणाऱ्या एका १७ वर्षीय अल्पवयीन मुलाचा कालव्यात पडून मृत्यू झाल्याची हृदयद्रावक घटना घडली आहे. शेख साजीद शेख माजिद रा. राजमोहल्ला, सेलू असे या दुर्दैवी मृताचे नाव आहे. बुधवारी, १७ डिसेंबर रोजी सायंकाळी पाच वाजेच्या सुमारास तो सोनवटी गावाजवळील निम्न दुधना प्रकल्पाच्या डाव्या कालव्यात पाणी घेण्यासाठी उतरला असता पाय घसरून पाण्यात पडला.साजीद हा सोनवटी येथे व्यंकटी धुमाळ यांच्या बांधकामावर मजुरीचे काम करत होता. सायंकाळी शौचास गेल्यानंतर बराच वेळ तो परतला नाही, त्यामुळे शोधाशोध सुरू झाली. कालव्याच्या काठावर खुणा आढळल्याने तो पाण्यात वाहून गेल्याचा अंदाज वर्तवण्यात आला. घटनेची माहिती मिळताच सेलू पोलीस ठाणे येथील पथकाने घटनास्थळी धाव घेतली. पोलीस निरीक्षक दीपक बोरसे यांच्या मार्गदर्शनाखाली पोलीस उपनिरीक्षक राऊत, हवालदार सूर्यवंशी, पोलीस शिपाई आघाव आणि डुबे यांनी शोधमोहीम सुरू केली.कालव्यातील पाण्याचा वेग आणि रात्रीचा अंधार यामुळे शोधकार्यात अडथळे आले. गुरुवारी, १८ डिसेंबर रोजी सकाळी पुन्हा पोलीस पाटील माणिकराव सोळंके, रामचंद्र पारवे, ग्रामस्थ आणि नातेवाईकांनी शोध सुरू केला असता कालव्याच्या खोल पाण्यात साजीदचा मृतदेह आढळून आला. पोलिसांनी पंचनामा करून मृतदेह उत्तरीय तपासणीसाठी सेलू येथील उपजिल्हा रुग्णालयात पाठवला आहे. कष्टाळू तरुणाचा दुर्दैवी मृत्यू झाल्याने परिसरात हळहळ व्यक्त केली जात आहे.
