सेलूतील प्रशिक्षणात उदयसिंह भोसले यांचे प्रतिपादन
परभणी : निवडणूक प्रशिक्षण हे मतदान प्रक्रियेतील मतदान केंद्राध्यक्ष, अधिकारी आणि कर्मचारी यांना सक्षम करण्यासाठी आहे. त्यामुळे कुठल्याही प्रसंगी घाबरून जाऊ नका, जाणीवपूर्वक दुर्लक्ष नको, वेळेचे भान ठेवून जबाबदारीने दिलेले कर्तव्य अचूकपणे झाले पाहिजे. ‘ चलो, चलता है…’ ही मानसिकता बदलावी आणि मतदानासह संपूर्ण निवडणूक प्रक्रिया निर्धोकपणे पार पाडण्यासाठी सदैव दक्षता अत्यंत महत्त्वाची आहे, याची जाणीव ठेवावी, असे प्रतिपादन निवडणूक निर्णय अधिकारी उदयसिंह भोसले यांनी मार्गदर्शन करतांना केले.
सेलू नगरपालिका निवडणुकीसाठी नियुक्त ६० पथकांतील मतदान केंद्राध्यक्ष, मतदान अधिकार्यांना मंगळवारी, २५ नोव्हेंबर रोजी दुसरे प्रशिक्षण देण्यात आले.सहायक निवडणूक अधिकारी तथा तहसीलदार डॉ.शिवाजी मगर, मुख्याधिकारी तुकाराम कदम, निरीक्षक प्रतिनिधी डायटचे वरिष्ठ अधिव्याख्याता गणेश शिंदे, नायब तहसीलदार जयश्री कोल्हे, हरिष टाक आदींची उपस्थिती होती.
तहसीलदार डॉ.मगर यांनी मतदान प्रक्रिया, विविध फॉर्म, नोंदी, मतदानाचा हिशोब, तसेच मतदान प्रक्रियेदरम्यान घ्यावयाची दक्षता याबाबत पीपीटीद्वारे सविस्तर मार्गदर्शन केले. प्रा. शिंदे यांनी निवडणुकीतील बदल समजून घेत, टीम वर्कच्या माध्यमातून भयमुक्त वातावरणात आणि निःपक्षपातीपणे निवडणुका पार पाडण्यासाठी सर्वांनी प्रयत्न करावेत, असे आवाहन केले, तर श्री.भोसले यांनी उपस्थितांशी संवाद साधताना विचारलेल्या प्रश्नांच्या माध्यमातून शंका निरसनाने समारोप केला.
दुपार सत्रात नूतन विद्यालयात ३० मास्टर ट्रेनर यांनी ईव्हीएम बाबतच्या हॅन्ड्सऑन प्रशिक्षणात मॉक पोल, सिलिंग, मतदान प्रक्रिया याविषयी माहिती देण्यात आली. फोटो ओळी :सेलू नगरपालिका निवडणुकीसाठी नियुक्त मतदान अधिकार्यांच्या दुसऱ्या प्रशिक्षणात मंगळवारी निवडणूक निर्णय अधिकारी उदयसिंह भोसले यांनी मार्गदर्शन केले.पूर्ण…
