सेलू येथील बसस्थानक परिसरातील घटना, गुन्हा दाखल करण्याची मागणी
सेलू : सेलू येथील एस.टी. महामंडळाच्या बसस्थानकात असलेल्या अधिकृत पुस्तक व विविध वस्तू भांडार या टीनशेड दुकानाची तोडफोड करून सुमारे १ लाख रुपयांचा माल चोरी केल्याप्रकरणी आणि ३ लाख रुपयांचे नुकसान केल्याबद्दल दुकान मालक तथा खोना न्यूज पेपर एजन्सीचे संचालक जयचंद हिराचंद खोना यांनी पोलीस उपविभागीय अधिकाऱ्यांकडे तक्रार दाखल केली आहे.
एस.टी. महामंडळाचे अधिकारी भोसले व त्यांच्या सहकाऱ्यांविरोधात ही तक्रार करण्यात आली आहे.खोना यांचे बसस्थानक परिसरात १९८३ पासून अधिकृत परवानाधारक पुस्तकालय व विविध वस्तू भांडार दुकान आहे. भाड्यावरून व ताब्यावरून २००५ पासून त्यांचा महामंडळासोबत वाद सुरू असून, तो मुंबई उच्च न्यायालयाच्या औरंगाबाद खंडपीठात आणि परभणी जिल्हा न्यायालयात न्यायप्रविष्ट आहे. असे असतानाही, परभणी येथील एस.टी.महामंडळाचे अधिकारी भोसले व त्यांच्या सहकाऱ्यांनी २४ नोव्हेंबर २०२५ रोजी सायंकाळी अचानक दडपशाही मार्गाने दुकानाचे लॉक व शटर तोडून आत प्रवेश केला. त्यांनी दुकानातील फ्रिज, इन्व्हर्टर, बॅटरी, पुस्तके, रोकड, तसेच महत्त्वाची कागदपत्रे उचलून नेली, असे तक्रारीत नमूद आहे. या अनधिकृत कारवाईबाबत घटनास्थळी पंचनामा करून संबंधितांवर जबरी चोरी व घरफोडीचा गुन्हा दाखल करण्याची मागणी खोना यांनी तक्रारीत केली आहे.
