सेलूमध्ये वर्षभर विविध उपक्रमांचे आयोजन, आज भव्य रंगभरण चित्रकला स्पर्धा, व्याख्यान
सेलू जि.परभणी : सेलू येथील नूतन विद्यालय शिक्षण संस्थेचे आणि सेलू शहर विकासाचे शिल्पकार दलितमित्र श्रीरामजी भांगडिया यांचे शतकोत्तर रजत जयंती महोत्सवी वर्ष बुधवारपासून, २६ नोव्हेंबरपासून सुरू होत आहे. यानिमित्त नूतन विद्यालय शिक्षण संस्थेचे वतीने आणि शहरातील विविध संस्थांच्या सहकार्याने वर्षभर अनेकविध उपक्रम राबवले जाणार आहेत.
संस्थेचे सचिव प्राचार्य डॉ.विनायकराव कोठेकर यांनी ही माहिती दिली. उपक्रमांच्या नियोजनासाठी आयोजित बैठकीत सुकाणू समितीची स्थापना करण्यात आल्याचे त्यांनी सांगितले. कृषी प्रकल्प, कार्यशाळा, स्मारक व्याख्यानमाला, पुस्तक प्रकाशन, वृक्षारोपण, स्वच्छता मोहिम, क्रीडा, सांस्कृतिक आणि चित्रकला स्पर्धा अशा विविध उपक्रमांद्वारे जयंती वर्ष साजरे करण्यात येणार आहे. श्रीरामजी भांगडिया यांच्या कार्याची प्रेरणा पुढे नेत सर्व उपक्रम यशस्वीपणे राबवण्याचा संकल्प बैठकीत करण्यात आला. बैठकीस अध्यक्ष डॉ. एस.एम.लोया, उपाध्यक्ष डी.के. देशपांडे, सहसचिव जयप्रकाशजी बिहाणी, प्रशासकीय अधिकारी प्राचार्य डॉ.शरद कुलकर्णी, कार्यकारिणी सदस्य तसेच शहरातील विविध संस्थांचे पदाधिकारी उपस्थित होते.
आज व्याख्यान, भव्य रंगभरण चित्रकला स्पर्धा
श्रीरामजी भांगडिया यांच्या शतकोत्तर रजत जयंती निमित्त नूतन विद्यालयात आयोजित कार्यक्रमात नूतन विद्यालय शिक्षण संस्थेचे प्रशासकीय अधिकारी प्राचार्य डॉ.शरद कुलकर्णी यांचे ‘ श्रीरामजी भांगडिया यांचे जीवन आणि कार्य ‘ याविषयावर सकाळी साडे नऊ वाजता व्याख्यान होणार आहे. तर संविधान दिनानिमित्त विशेष उपक्रमांतर्गत डॉ. सुरेश हिवाळे हे मनोगत व्यक्त करून, संविधान उद्देशिकेचे वाचन करतील. कार्यक्रमाच्या अध्यक्षस्थानी संस्थेचे अध्यक्ष डॉ. एस.एम.लोया हे असतील. सकाळी ९ ते ११ या वेळेत १८ व्या भव्य रंगभरण चित्रकला स्पर्धेचे आयोजन नूतन विद्यालय करण्यात आले आहे. पहिली ते १० वीचे शेकडो विद्यार्थी यात सहभाग नोंदणार आहेत, असे संयोजक किशोर कटारे यांनी सांगितले.
