मोरेगाव बंधाऱ्यातील पाणी उपसा तात्काळ थांबवा, सेलू दबाव गटाचे उपजिल्हाधिकाऱ्यांना निवेदन
सेलू, दि. ०२ जून : सध्या भर उन्हाळ्यात पाण्याचे भीषण दुर्भिक्ष जाणवत असताना मोरेगाव येथील दुधना नदीवरील बंधाऱ्यातून संबंधित ठेकेदाराकडून बेसुमारपणे पाण्याचा उपसा केला जात आहे. हा पाणी उपसा पूर्णपणे बेकायदेशीर आहे.
या वर्षीचा तीव्र उन्हाळा आणि नैसर्गिक आपत्तीमुळे जर यंदा पावसाळा उशीरा आला, तर या संपूर्ण परिसरात तीव्र पाणी टंचाई निर्माण होऊ शकते. तसेच जनावरांना देखील पिण्याच्या पाण्याची टंचाई जाणवू शकते. त्यामुळे बंधाऱ्यातून होणारा हा पाणी उपसा तात्काळ बंद करण्यात यावा व यापुढे पाऊस पडेपर्यंत पाणी उपसा करण्यास प्रतिबंध करण्यात यावा, अशी मागणी सेलू दबाव गटाच्या वतीने आज मंगळवारी उपजिल्हाधिकारी यांना एका निवेदनाद्वारे करण्यात आली आहे.या निवेदनावर दबाव गटाचे निमंत्रक ॲड. श्रीकांत वाईकर, इसाक पटेल, ओमप्रकाश चव्हाळ, मुकुंद टेकाळे, सतिश काकडे, ॲड. देवराव दळवे, महादेव लोंढे, सुभाष काकडे, आबासाहेब भुजबळ, ॲड. योगेश सूर्यवंशी, राजेंद्र केवारे, गुलाबराव पौळ, उद्धवराव सोळंके, लक्ष्मण प्रधान, रामचंद्र कांबळे आदींच्या स्वाक्षऱ्या आहेत.
