विभागीय सहनिबंधकांचा मोठा दिलासा
राजकीय षडयंत्रातून झालेली कारवाई नियमबाह्य; निवडणूक प्रक्रिया रद्द करण्यासाठी न्यायालयात जाणार : रोकडे यांचा इशारा
देशनिष्ठ प्रतिनिधी, पालम : पालम येथील सहाय्यक निबंधक, सहकारी संस्था यांनी दि. १३/५/२०२६ रोजी गणेशराव रोकडे यांचे विविध कार्यकारी सेवा सोसायटीचे सभासदत्व रद्द करण्याचे आदेश दिले होते. त्या आदेशाविरोधात रोकडे यांनी विभागीय सहनिबंधक, सहकारी संस्था, छत्रपती संभाजीनगर यांच्याकडे अपील दाखल केले होते. या अपिलात त्यांचे सभासदत्व कायम ठेवण्याचे आदेश देण्यात आल्याची माहिती जिल्हा मध्यवर्ती सहकारी बँकेचे माजी संचालक गणेशराव रोकडे यांनी दि. २८ जुलै रोजी आयोजित पत्रकार परिषदेत दिली.
पुढे बोलताना रोकडे म्हणाले की, स्थानिक राजकीय पुढार्यांच्या दबावातून पालम येथील सहाय्यक निबंधकांनी वाडी खुर्द येथील विविध कार्यकारी सेवा सोसायटीचे माझे सभासदत्व नियमबाह्य पद्धतीने रद्द केले होते. हे सदस्यत्व रद्द करण्याची कारवाई केवळ मला जिल्हा मध्यवर्ती बँकेच्या निवडणुकीपासून रोखण्यासाठी करण्यात आलेला खटाटोप होता, असा थेट आरोप त्यांनी पत्रकार परिषदेत केला.याच अन्यायाविरोधात विभागीय सहनिबंधक, सहकारी संस्था, छत्रपती संभाजीनगर यांच्याकडे अपील करण्यात आले होते. अपिलाच्या अनुषंगाने विभागीय सहनिबंधकांसमोर प्रत्यक्षात झालेल्या सुनावणीत विविध मुद्द्यांची पडताळणी करण्यात आली. यात नियम २१ व नियम ४५ चे पालन झाले अथवा नाही, तसेच कलम ११ अंतर्गत पात्रतेबाबत उपलब्ध सर्व पुराव्यांचे सखोल मूल्यांकन करण्यात आले. प्रत्येक मुद्द्यावर स्वतंत्र नोंद घेत महाराष्ट्र सहकारी संस्था अधिनियम १९६० (व नियम १९६१) तसेच संबंधित संस्थेच्या पोटनियमांच्या (उपविधी) अनुषंगाने सकारण आदेश पारित करणे आवश्यक असल्याचे स्पष्ट करत, रोकडे यांच्यावर करण्यात आलेली कारवाई नियमबाह्य असल्याचे नमूद करण्यात आले. तसेच त्यांचे सदस्यत्व कायम ठेवण्याचे आदेश दि. ९ जुलै रोजी पारित करण्यात आले आहेत.
चुकीच्या कारवाईविरोधात न्यायालयात लढा उभारणार : रोकडे
पालम येथील सहाय्यक निबंधक, सहकारी संस्था यांनी कोणत्याही प्रकारच्या कागदपत्रांची पूर्तता न करता माझ्याविरोधात षडयंत्र रचून चुकीच्या पद्धतीने कारवाई केली. त्यांच्या या चुकीमुळे मला जिल्हा मध्यवर्ती सहकारी बँकेच्या निवडणुकीपासून रोखण्याचे काम झाले आहे. या संपूर्ण प्रक्रियेविरोधात आणि झालेली निवडणूक प्रक्रिया रद्द करण्यासाठी मी न्यायालयात लढा लढविणार असल्याचे गणेशराव रोकडे यांनी पत्रकार परिषदेत स्पष्ट केले.
