पुणे येथे शनिवारी वितरण
छत्रपती संभाजीनगर : महात्मा ज्योतिराव फुले आणि क्रांतीज्योती सावित्रीबाई फुले यांच्या जयंतीनिमित्त पुण्यात ज्ञानज्योती संमेलन व कौतुक सन्मान सोहळा २०२६ चे आयोजन करण्यात आले आहे. या सोहळ्यात छत्रपती संभाजीनगर येथील डॉ. दत्ता शेषराव ठुबे पाटोदकर यांना त्यांच्या उल्लेखनीय सामाजिक कार्याबद्दल ज्ञानज्योती साहित्य कर्तृत्व गौरव पुरस्कार देऊन गौरविण्यात येणार आहे.
रणरागिणी मल्टीपर्पज फाऊंडेशन, अहिल्यानगर आणि आनंद आधार बहुउद्देशीय सामाजिक संस्था, पुणे यांच्या संयुक्त विद्यमाने या विशेष कार्यक्रमाचे आयोजन करण्यात आले आहे. विविध क्षेत्रात ज्ञानज्योत उजळत समाजासाठी आपले जीवन समर्पित करणाऱ्या मान्यवरांचा सन्मान करणे हा या सोहळ्याचा मुख्य उद्देश आहे.हा पुरस्कार वितरण सोहळा शनिवार, ३ जानेवारी २०२६ रोजी दुपारी २ वाजता नवी पेठ येथील गांजवे चौक परिसरातील पत्रकार भवन येथे संपन्न होणार आहे. डॉ.ठुबे यांच्या निवडीबद्दल निवड समितीचे अध्यक्ष आणि आयोजक संस्थांनी अभिनंदन केले असून शुभेच्छा दिल्या आहेत. या सोहळ्यास बहुसंख्येने उपस्थित राहण्याचे आवाहन आयोजकांच्या वतीने करण्यात आले आहे.
