विज्ञान मेळाव्यात हर्षदा काष्टे, दिव्या, आयेशा विजेते!
सेलू तालुकास्तरीय विज्ञान वक्तृत्व स्पर्धेत ज्ञानतीर्थ, जिप गुगळी धामणगाव, व्हिजन इंग्लिश शाळेचे यश
सेलू : येथील विवेकानंद प्राथमिक विद्यालयात अखिल भारतीय विज्ञान मेळाव्याअंतर्गत तालुकास्तरीय वक्तृत्व स्पर्धा उत्साहात पार पडली. ‘क्वांटम युगाची सुरुवात: संभ्याव्यता व आव्हाने’ या विषयावर आधारित या स्पर्धेत तालुक्यातील १४ शाळांमधील विद्यार्थ्यांनी उत्स्फूर्त सहभाग नोंदवला. केंद्रप्रमुख एकनाथ जाधव यांनी विज्ञाननिष्ठ होण्याची गरज व्यक्त करत, अशा स्पर्धांच्या माध्यमातून विद्यार्थ्यांमध्ये वैज्ञानिक दृष्टिकोन वाढण्यास मदत होते, असे मत मांडले.
उपशिक्षणाधिकारी गजानन वाघमारे आणि गटशिक्षणाधिकारी मनोज चव्हाण यांच्या मार्गदर्शनाखाली झालेल्या या स्पर्धेत विद्यार्थ्यांनी आपल्या प्रभावी वक्तृत्वाने श्रोत्यांना मंत्रमुग्ध केले. विवेकानंद विद्यालयाचे मुख्याध्यापक शंकर शितोळे यांनी अध्यक्षस्थान भूषवले, तर तालुका विज्ञान प्रमुख ए. व्ही. पद्माकर उपस्थित होते. मान्यवरांच्या हस्ते विजेत्या विद्यार्थ्यांना तसेच सहभागी विद्यार्थ्यांना प्रमाणपत्र देऊन गौरविण्यात आले. कार्यक्रमाचे यशस्वी सूत्रसंचालन विजय चौधरी यांनी केले, तर रागिणी जकाते आणि स्वप्नाली देवडे यांनी कार्यक्रमाच्या आयोजनात मोलाची मदत केली.
या विद्यार्थ्यांनी मारली बाजी
स्पर्धेत पुढील विद्यार्थी-विद्यार्थिनींनी उत्कृष्ट प्रदर्शन करत विजय मिळवला :
- प्रथम क्रमांक: हर्षदा नीळकंठ काष्टे (ज्ञानतीर्थ विद्यालय, सेलू)
- द्वितीय क्रमांक: दिव्या गणेश भागवत (जि. प. शाळा, गुगळीधामणगाव)
- तृतीय क्रमांक: आयेशा मो. अनिस शेख (व्हिजन इंग्लिश स्कूल, सेलू)
