ग्राहक, महिला, नागरिक त्रस्त; कोणी वाली आहे ?
सेलू : सेलू येथील महावितरण कार्यकारी अभियंता कार्यालयात जाणाऱ्या मुख्य रस्त्याच्या दुरवस्थेमुळे नागरिक, महिला, ज्येष्ठ नागरिक आणि कर्मचाऱ्यांची मोठी गैरसोय होत आहे. विभागीय कार्यालयाचा दर्जा मिळाला असला तरी, या कार्यालयात प्रवेश करण्याचा मुख्य रस्ता चिखलामुळे पूर्णपणे खराब झाला आहे.
कामकाजाबद्दलही अनेक तक्रारी
या कार्यालयाच्या कामकाजाबद्दलही अनेक तक्रारी आहेत. कनिष्ठ अभियंता पद अनेक दिवस रिक्त होते आणि नुकतेच रुजू झालेले कनिष्ठ अभियंता कार्यालयात कमी वेळ थांबतात. कार्यालय अनेकदा कुलूपबंद असते. अखिल भारतीय ग्राहक पंचायतचे तालुकाध्यक्ष सतीश जाधव यांनी २८ ऑगस्ट रोजी हा प्रत्यक्ष अनुभव सांगितला आहे. याशिवाय, सौर ऊर्जेची प्रलंबित कामे, वाढीव वीजबिलांच्या तक्रारी आणि वारंवार वीजपुरवठा खंडित होण्याच्या समस्या कायम आहेत. कनिष्ठ अभियंत्यांचा फोन बंद असतो, अशीही ग्राहकांची तक्रार आहे.
राज्यमंत्र्यांनी लक्ष घालावे
हा परिसर खुद्द राज्याच्या वीजमंत्र्यांचा मतदारसंघ असल्याने लवकरात लवकर या समस्यांवर तोडगा निघेल, अशी अपेक्षा नागरिक व्यक्त करत आहेत. महाराष्ट्र विद्युत वितरण कंपनीने या गंभीर बाबीची तातडीने दखल घ्यावी, अशी मागणी नागरिक करत आहेत.
