प्रथमेश पवारची विभागीय तायकांदो स्पर्धेसाठी निवड

सेलू : क्रीडा व युवक सेवा संचालनालय, महाराष्ट्र राज्य, जिल्हा क्रीडा परिषद, परभणी आणि परभणी जिल्हा तायकांदो असोसिएशन यांच्या संयुक्त विद्यमाने नुकत्याच पार पडलेल्या जिल्हास्तरीय तायकांदो स्पर्धेत सेलू येथील न्यू हायस्कूलच्या प्रथमेश भारत पवार याने सुवर्णपदक जिंकले आहे. त्याची आगामी विभागीय स्पर्धेसाठी निवड झाली आहे. २०२५-२६ या वर्षासाठी आयोजित ही स्पर्धा परभणीच्या जिल्हा क्रीडा संकुलमधील बॅडमिंटन हॉल येथे पार पडली. मराठवाडा शिक्षण प्रसारक मंडळ, संभाजीनगर अंतर्गत असलेल्या न्यू हायस्कूल, सेलू येथील इयत्ता पाचवीमध्ये शिकणाऱ्या प्रथमेशने १४ वर्षांखालील वयोगटात उत्कृष्ट कामगिरी करत हे सुवर्णपदक मिळवले. क्रीडा शिक्षक आर.ए.कदम आणि ए.बी.पवार यांचे प्रथमेशला मार्गदर्शन मिळाले.प्रथमेशच्या या लक्षणीय यशाबद्दल मुख्याध्यापक धनंजय भागवत आणि शिक्षकांनी अभिनंदन केले असून विभागीय स्पर्धेसाठी शुभेच्छा दिल्या आहेत.