रायरेश्वर विद्यालयात दहीहंडीचा उत्सव

परभणी : धर्मापुरी पाटी येथील ज्ञानसाधना प्रतिष्ठान संचलित रायरेश्वर माध्यमिक व उच्च माध्यमिक विद्यालयात गोकुळाष्टमीनिमित्त दहीहंडी कार्यक्रमाचे आयोजन करण्यात आले होते. संस्थेचे अध्यक्ष किरण सोनटक्के आणि सचिव शीतल सोनटक्के यांच्या उपस्थितीत हा कार्यक्रम पार पडला. कार्यक्रमाची सुरुवात राधा आणि कृष्ण यांच्या प्रतिमेच्या पूजनाने झाली. यावेळी संस्थेचे अध्यक्ष किरण सोनटक्के यांनी विद्यार्थ्यांना कृष्णाचा जन्म आणि जन्माष्टमीचे महत्त्व सांगितले. कार्यक्रमात विद्यार्थ्यांनी उत्साहाने सहभाग घेतला. इयत्ता ५ वीच्या रुद्र संतोष मस्के याने श्रीकृष्णाची, तर वैष्णवी माधव चव्हाण हिने राधेची वेशभूषा परिधान केली होती. तसेच, इयत्ता ६ वीच्या सुप्रिया शेळके आणि श्रेया गायकवाड यांनी गवळणी सादर केल्या. यावेळी दहीहंडी फोडण्यासाठी इयत्ता ४ थी ते ८ वीच्या विद्यार्थ्यांनी १० गटांमध्ये नोंदणी केली होती. त्यापैकी इयत्ता ४ थीच्या गटाने दहीहंडी फोडण्याचा मान पटकावला. कार्यक्रमाच्या शेवटी सर्व विद्यार्थ्यांना प्रसाद वाटण्यात आला. या कार्यक्रमाचे सूत्रसंचालन स्नेहल पवार आणि सुप्रिया जाधव यांनी केले, तर भुसारे यांनी आभार मानले. कार्यक्रमाच्या यशस्वीतेसाठी सर्व शिक्षक आणि कर्मचाऱ्यांनी परिश्रम घेतले.