परभणी : येथील महिला उद्योजकांनी सुरू केलेल्या सनरायझर्स एअर प्रोडक्ट अँड इंडस्ट्रीजला यावर्षीचा ‘उत्कृष्ट उद्योग’ म्हणून जिल्ह्यातून द्वितीय क्रमांकाचा पुरस्कार मिळाला आहे. स्वातंत्र्यदिनानिमित्त परभणी येथे झालेल्या कार्यक्रमात पालकमंत्री मेघना बोर्डीकर आणि जिल्हाधिकारी रघुनाथ गावडे यांच्या हस्ते हा पुरस्कार प्रदान करण्यात आला.
महाराष्ट्र शासनाच्या उद्योग मंत्रालयातर्फे दरवर्षी लघु उद्योगांना प्रोत्साहन देण्यासाठी हे पुरस्कार दिले जातात. यावेळी कार्यक्रमात जिल्हा उद्योग केंद्राचे महाव्यवस्थापक अमोल बळे आणि व्यवस्थापक यंदे उपस्थित होते.
सनरायझर्स एअर प्रोडक्ट अँड इंडस्ट्रीजने आतापर्यंत हजारो रुग्णांना ऑक्सिजन पुरवठा केला असून, अनेक महिलांना रोजगारही उपलब्ध करून दिला आहे. परभणी जिल्ह्यात या प्रकारचा हा एकमेव प्रकल्प आहे. विशेषतः कोविड काळात ऑक्सिजनचा तुटवडा असताना या महिला उद्योजकांनी केलेली ही कामगिरी प्रशंसनीय आहे.
या उद्योगाच्या संचालिका उषा ज्ञानराज खटिंग, अल्पा विलास वारल, शामल लक्ष्मीकांत रापते, प्रिया हर्षद कत्रूवार आणि गीतांजली मोरे यांना या यशाबद्दल सन्मानित करण्यात आले. या पुरस्कारामुळे जिल्ह्यासह सर्वच स्तरांतून त्यांचे अभिनंदन होत आहे.
