पालकमंत्री मेघना साकोरे-बोर्डीकर यांची माहिती, उर्वरित अंतरासाठी पर्यायी मार्गाचा नवा प्रस्ताव सादर
जिंतूर : एशियन डेव्हलपमेंट बँक (एडीबी) योजनेअंतर्गत जिंतूर विधानसभा मतदारसंघातील जिंतूर–येलदरी–सेनगाव रस्त्याच्या सुधारणेसाठी ३४० कोटी रुपयांचा निधी मंजूर करण्यात आला आहे. या निधीतून किमी ५५/६०० ते ७०/६०० या दरम्यान ३४ किलोमीटर लांबीचा रस्ता सिमेंट काँक्रीटचा करण्यात येणार आहे. दरम्यान, या प्रकल्पातील येलदरी ते सेनगाव या टप्प्यातील रस्त्याचे काम आधीच पूर्ण झालेले आहे. त्यामुळे त्याऐवजी उर्वरित १९ किलोमीटर लांबीचा पर्यायी सुधारित रस्ता प्रस्तावित करण्यात आला आहे. पालकमंत्री मेघना साकोरे-बोर्डीकर यांनी १२ सप्टेंबर २०२६ रोजी ही माहिती दिली.
जिंतूर ते येलदरी या रस्त्याची अत्यंत दयनीय अवस्था झाली असून हा महामार्ग पुढे मराठवाडा आणि विदर्भाला जोडणारा एक अत्यंत महत्त्वाचा दुवा आहे. त्यामुळे हे काम प्राधान्याने हाती घेण्यात येत आहे. या प्रकल्पातील येलदरी ते सेनगाव या टप्प्यातील रस्त्याचे काम आधीच पूर्ण झालेले आहे. त्यामुळे त्याऐवजी उर्वरित १९ किलोमीटर लांबीचा पर्यायी सुधारित रस्ता प्रस्तावित करण्यात आला आहे.या सुधारित आराखड्यात राज्य महामार्ग २४८ वरील सावंगी म्हाळसा, सावली, इटोली, पोखरणी तांडा, चिंचोली, दराडे वस्ती, आसेगाव, दुधगाव ते प्रमुख जिल्हा मार्ग ७ या मार्गाचा समावेश करण्यात आला आहे.या रस्त्याच्या मंजुरीसाठी परभणी मुंबई येथील मंत्रालयात सार्वजनिक बांधकाम मंत्री शिवेंद्रराजे भोसले यांची प्रत्यक्ष भेट घेऊन निवेदन दिले आहे, असे पालकमंत्री बोर्डीकर यांनी सांगितले असून त्यावर मंत्री महोदयांनी या सुधारित रस्त्याचे तातडीने सर्वेक्षण करण्याचे आदेश तसेच सविस्तर प्रकल्प अहवाल (डीपीआर) व अंदाजपत्रक सादर करून पुढील कार्यवाही लवकर पूर्ण करण्याचे निर्देश संबंधित विभागाला दिले आहेत. यावेळी सुनील भोंबे पाटील, अधिकारी उपस्थित होते.
