उत्पादक शेतकऱ्यांना लवकरच मोठा दिलासा मिळणार
सेलू : कृषी उत्पन्न बाजार समितीने तालुक्यातील शेतकऱ्यांच्या हितासाठी एक महत्त्वपूर्ण निर्णय घेतला असून, लवकरच बाजार समिती अंतर्गत हळद बीट सुरू करण्याबाबत सकारात्मक विचारविनिमय सुरू आहे. या निर्णयामुळे तालुक्यातील हळद उत्पादक शेतकऱ्यांना मोठा फायदा होणार आहे. सभापती डॉ.संजय रोडगे यांनी ही माहिती दिली.
आतापर्यंत हळद विक्रीसाठी शेतकऱ्यांना इतर बाजारपेठांमध्ये जावे लागत होते. यामुळे त्यांना वाहतूक खर्च आणि वेळेचा अपव्यय सहन करावा लागत होता. स्थानिक स्तरावरच हळद विक्रीची सुविधा उपलब्ध झाल्यास शेतकऱ्यांचा खर्च कमी होऊन त्यांना योग्य आणि स्पर्धात्मक दर मिळण्यास मदत होणार आहे. यापूर्वी कापसाला देखील या बाजार समितीत चांगल्या प्रकारे दर मिळाल्याने शेतकऱ्यांचा विश्वास अधिक दृढ झाला आहे. त्याच धर्तीवर हळद बीट सुरू झाल्यास बाजारपेठ अधिक सक्षम होईल, असा विश्वास व्यक्त केला जात आहे.या उपक्रमासाठी बाजार समितीचे सभापती संजय रोडगे तसेच सर्व संचालक मंडळ सक्रियपणे प्रयत्नशील आहेत. व्यापारी बांधवांनी हळद खरेदी प्रक्रियेत सहभागी होण्यासाठी आपली नावनोंदणी लवकरात लवकर करावी, असे आवाहन करण्यात आले आहे. यामुळे बाजारात स्पर्धात्मक वातावरण निर्माण होऊन शेतकऱ्यांना अधिक चांगला लाभ मिळेल. शेतकरी व व्यापारी यांच्या सहकार्याने हा उपक्रम यशस्वी होईल, असा विश्वास संजय रोडगे यांनी व्यक्त केला आहे.
