सेलूतील विनोद बोराडे मित्रमंडळाच्या उपक्रमाचे १३ वे वर्ष
सेलू जि.परभणी : शारदीय नवरात्र महोत्सवानिमित्त सेलू येथील माजी नगराध्यक्ष विनोद बोराडे मित्रमंडळाच्या वतीने मागील १३ वर्षांपासून महिलांसाठी राबविण्यात येत असलेल्या सामाजिक उपक्रमांतर्गत, मंठा येथील सिद्धपीठ श्री रेणुका जगदंबा माता मोफत दर्शन प्रवास यात्रेचा शुभारंभ रविवारी, २८ सप्टेंबर रोजी सकाळी दहा वाजता झाला. दरवर्षी शेकडो महिला भाविक यात्रेमध्ये सहभागी होत असतात.
श्री साईबाबा मंदिर परिसरात भागवताचार्य नंदकिशोर महाराज गोंदीकर व माजी नगराध्यक्ष विनोद बोराडे यांच्या हस्ते विधीवत वाहन पूजनाने दर्शन प्रवासयात्रेला सुरुवात झाली. याप्रसंगी साईराज बोराडे, राजेंद्र पवार, बाळू झमकडे, बालासाहेब सरकाळे, प्रतीक बोराडे, शंकर राऊत, सुनील घेवारे, रौफभाई, गौतम धापसे, संतोषगुरू, मनोहरगुरू गोळेगावकर आदींची प्रमुख उपस्थिती होती.
पंचक्रोशीतील मंठ्याची श्री रेणुका जगदंबा माता भाविकांचे मोठे श्रद्धास्थान आहे. डोंगरावरील मूळ पुरातन मंदिरामध्ये तांदळा स्वरूपातील उत्तरमुखी देवी विलोभनीय आहे. दरवर्षी महिला भाविकांचा मोठा प्रतिसाद असतो, असे संयोजक विनोद बोराडे यांनी सांगितले. यात्रेनिमित्त मंठा येथे मंदिर पायथ्याला व सेलूतही मित्रमंडळाने तात्पुरते विश्रांती स्थळ उभारले आहे. चहापान व पिण्याच्या पाण्याची व्यवस्था आहे, असे समन्वयक राजेंद्र पवार यांनी सांगितले. उपक्रमासाठी साईराज बोराडे मित्रमंडळासह विविध समित्यांचे स्वयंसेवक पुढाकार घेत आहेत.
